Дэпутат Вярхоўнай Рады Ўкраіны Аляксандр Анішчанка заяўляе, што перадаў спэцслужбам ЗША кампрамат на прэзыдэнта Ўкраіны Пятра Парашэнку.
«Перадаў. Амэрыканскім спэцслужбам 29 лістапада. Яны прыляталі да мяне ў Эўропу», — адказаў Анішчанка сёньня на пытаньне «Ўкраінскай праўды», ці перадаваў ён гэты кампрамат камусьці.
Пакуль што пацьверджаньня гэтай інфармацыі зь іншых крыніц няма, у Адміністрацыі прэзыдэнта гэтую заяву Анішчанкі не камэнтавалі.
Раней сёньня ў Службе бясьпекі Ўкраіны (СБУ) паведамілі аб пачатку дасудовага сьледзтва ў дачыненьні да Анішчанкі па прыкметах дзяржаўнай здрады.
Анішчанка адзначыў, што абвінавачаньні СБУ супраць яго зьяўляюцца адказам на артыкул у выданьні «Страна», дзе ён абвінавачвае адміністрацыю прэзыдэнта Ўкраіны ў скупцы галасоў у парлямэнце празь яго і некалькіх іншых дэпутатаў.
«Гэта адказ на ўчарашні артыкул. У мяне шмат кампрамату на Парашэнку. Таму зараз пачнецца, што гэта рука Крамля», — сказаў ён.
Анішчанка таксама абверг ранейшую інфармацыю аб наяўнасьці ў яго пашпарту Расеі.
У СБУ сьцьвярджаюць, што Анішчанка пагадзіўся на супрацоўніцтва з расейскімі ўладамі для дэстабілізацыі сытуацыі ва Ўкраіне.
Раней у Нацыянальным антыкарупцыйным бюро Ўкраіны (НАБУ) заявілі, што Анішчанка падазраецца ў арганізацыі схемы крадзяжу сродкаў пры здабычы і продажы прыроднага газу, у выніку чаго дзяржаве была нанесена шкода на суму каля трох мільярдаў грыўняў (120 мільёнаў даляраў).
Сам Анішчанка адмаўляў сваё дачыненьне да гэтага і называў узбуджаную справу ціскам на яго з мэтай адабраць ягоны бізнэс.
У ліпені сёлета Вярхоўная Рада Ўкраіны пазбавіла Анішчанку дэпутацкай недатыкальнасьці. У канцы ліпеня дэпутат паведаміў, што знаходзіцца ў Лёндане, але адзначыў, што ня мае намеру прасіць там палітычнага прытулку. На допыт НАБУ ў Кіеў ён не прыбыў.
Усяго ў рамках гэтай крымінальнай вытворчасьці затрыманыя 12 падазраваных.
У жніўні Анішчанку абвясьцілі ва ўсеўкраінскі вышук.
