Лінкі ўнівэрсальнага доступу

Каралева Вялікай Брытаніі падпісала закон аб праве на татальнае праслухоўваньне — брытанскі «пакет Яравой»


Каралева Вялікай Брытаніі Лізавета

Каралева Вялікай Брытаніі Лізавета

Пасьля ўхваленьня парлямэнтам Вялікай Брытаніі каралева Лізавета падпісала «Біль пра паўнамоцтвы на дасудовыя расьсьледаваньні». Біль, што называюць «брытанскім пакетам Яравой» альбо «законам шпегаў», дае права брытанскім спэцслужбам і доўгаму шэрагу ўстановаў, які пералічвае The Independent, сачыць за брытанцамі і праглядаць іхную інтэрнэт-гісторыю. Закон набудзе сілу ў 2017 годз

Біль рыхтавала прэм’ер-міністар Тэрэза Мэй, якая спрабавала ўвесьці нават больш жорсткі закон у 2014 годзе, калі была міністрам унутраных спраў, ды тады закон заблякаваў Высокі суд Лёндану і Эўрапейскі суд. Эўрапейскі суд разгледзіць і гэты біль, але ж заканадаўства Эўразьвязу ў хуткім часе можа перастаць распаўсюджвацца на Вялікую Брытанію — тая прагаласавала на рэфэрэндуме за выхад з ЭЗ.

Супраць закону выступалі буйныя IT-кампаніі, перабежчык з ЦРУ Эдвард Сноўдэн называў яго «самым экстрэмальным у гісторыі заходняй дэмакратыі».

«Закон шпегаў» значна пашырае паўнамоцтвы спэцслужбаў у масавым зборы зьвестак і сачэньні за канкрэтнымі грамадзянамі. Біль робіць іх больш шырокімі, чым у большасьці дэмакратычных краінаў.

Ён абавязвае правайдэраў захоўваць гісторыю наведваньняў сайтаў кожнага карыстальніка цягам году і дае права праглядаць гэтую гісторыю праваахоўнікам, спэцслужбам, Мінабароны і МУС, нават Управе аховы працы і Агенцтву харчовых стандартаў. Паліцыя і спэцслужбы цяпер могуць без праблемаў узломваць кампутары карыстальнікаў, а таксама легальна перахопліваць зьвесткі паводле сцэнароў, якія выкрываў Сноўдэн. Але, прынамсі, «закон шпегаў» не дае спэцслужбам прамога доступу да перапіскі карыстальнікаў і адрасоў канкрэтных старонак, што чалавек наведваў на сайце.

У Вялікай Брытаніі цяпер будзе створаны спэцыяльны орган, які будзе сачыць за законнасьцю доступу спэцслужбаў да зьвестак карыстальнікаў. Ды праслухоўваньне дэпутатаў парлямэнту зможа санкцыянаваць толькі прэм’ер-міністар.

У Беларусі тым часам КДБ можа легальна слухаць любыя размовы, а правайдэры абавязаныя захоўваць гісторыю наведваньняў карыстальнікаў цягам году і выдаваць яе спэцслужбам на легальны запыт. Беларусы ня раз заяўлялі, што спэцслужбы ўзломвалі іх электронную пошту ці акаўнты ў сацсетках без законных падстаў, ды ёсьць спосаб праверыць, ці не ўзламалі вас.

Паказаць камэнтары

XS
SM
MD
LG