Дата дня
28 лістапада 1923 году у Беларусі было заснаванае літаратурнае аб’яднаньне «Маладняк».
Абʼяднаньне праіснавала пяць гадоў і ўвайшло ў гісторыю як першая і найбольш масавая пісьменьніцкая арганізацыя Беларусі. Філіі «Маладняка» існавалі па ўсёй краіне, а таксама ў Латвіі, Расеі і Чэхіі. Ініцыятарамі абʼяднаньня выступілі Міхась Чарот, Анатоль Вольны, Алесь Дудар, Андрэй Александровіч, Адам Бабарэка і Язэп Пушча.
«Маладняк» усімі сіламі імкнуўся адпавядаць сваёй назьве, заклікаў да рэвалюцыйнай перамены сьвету і да таго, каб пісьменьнікаў старой фармацыі скінуць з карабля гісторыі. У 1930-я гады большасьць сяброў гэтай арганізацыі былі рэпрэсаваныя.
Таксама ў гэты дзень:
1520 — каманда Фэрнана Магелана стала першай у Эўропе, якая з Атлянтыкі патрапіла ў Ціхі акіян.
1943 — пачалася Тэгеранская канфэрэнцыі паміж кіраўнікамі Вялікабрытаніі, ЗША і СССР у ходзе Другой усясьветнай вайны. Канфэрэнцыя стала першай сустрэчай «Вялікай Тройкі», на якой вырашаліся дзеяньні ваенныя дзеяньні і абмяркоўваліся пляны пасьля іх сканчэньня.
1989 — пасьля пратэстаў Аксамітнай рэвалюцыі Камуністычная партыя Чэхаславакіі абвясьціла аб увядзеньні манапольнага кантролю над краінай.
1991 — Паўднёвая Асэтыя абвяшчае незалежнасьць ад Грузіі.
1994 — у Нарвэгіі адбыўся рэфэрэндум, згодна з вынікамі якога большасьць насельніцтва адмовілася ад далучэньня да Эўрапейскага Зьвязу.
У гэты дзень нарадзіліся:
1757 — Уільям Блэйк, ангельскі паэт, пісьменьнік, мастак, друкар.
1820 — Фрыдрых Энгельс, нямецкі філёзаф і эканаміст.
1880 — Аляксандар Блок, расейскі паэт-сымбаліст.
1907 — Андрэй Павук, беларускі мастак.
1931 — Генадзь Кляўко, беларускі паэт, перакладчык.
1958 — Уладзімер Карват, беларускі вайсковы лётчык, першы Герой Беларусі.
У памяці:
1937 — у Смаленску быў расстраляны Леў Цьвяткоў, беларускі мовазнавец, літаратуразнавец, пэдагог, журналіст.
1999 — памёр Яўген Шыпіла, беларускі акцёр.
2012 — памёр Алег Сурскі, беларускі дызайнер, мастак, арт-крытык і мастацтвазнаўца.
Што будзе сёньня?
Кіраўнік Беларусі Аляксандар Лукашэнка наведае Азэрбайджан з афіцыйным візытам. Ён правядзе перамовы з прэзыдэнтам Азэрбайджана Ільхамам Аліевым.
Што будзе?
Курсы «Мова нанова»
Тэма заняткаў: «Хіп-хоп». Госьць заняткаў — паэт і перакладчык Віталь Рыжкоў.
Музычны госьць — Аляксей Бор.
Месца правядзеньня: Менск, ГЦ «Цівалі», вул.Прытыцкага, 29 (мэтро «Спартовая»), аўдыторыя № 366 (трэці паверх, лявей наперад калідорам ад эскалятару). Пачатак а 18:30. Уваход вольны.
Лекцыя «Тайна лябірынтаў нэаліту»
Тацяна Зайдаль прачытае лекцыю ў межах аўтарскага курсу па гісторыі мастацтваў, які праходзіць зараз у прасторы «Цэх». У межах лекцыі будзе разглядацца археалёгія мастацтва старажытных пячораў.
Месца правядзеньня: Менск, прастора «Цэх» (вул. Кастрычніцкая 16). Пачатак а 19:00. Удзел каштуе 4 рублі.
Беларуская інтэлектуальная гульня
Беларуская інтэлектуальная гульня (БІГ) 28 лістапада распачне новы сэзон. БІГ — гэта камандная гульня, якая складаецца з 9 тураў. Кожны тур мае сваю тэму. Напрыклад, «Беларускі бізнэс», «Мастацтва», «Гісторыя», «Кухня», «Горад» і г.д.
Месца правядзеньня: Менск, паб «Піўняры» (вул. Лабанка 77). Пачатак а 19:00. Кошт удзелу: 5 рублёў.
Тэатар
Спэктакль «У падарожжы»
Падчас падарожжа двое маладых людзей спрабуюць захапіць самалёт, і высоўваюць свае патрабаваньні. Але героі спэктаклю незвычайныя тэрарысты, бо патрабуюць спыненьне войнаў ва ўсім сьвеце. Спэктакль ідзе ў межах фэстывалю «Тэатральны куфар».
Месца правядзеньня: Менск, Ліцэй БДУ (вул. Ульянаўская, 8). Пачатак а 17:00. Квіткі каштуюць 5.50 рублёў.
Спэктакль «Камэра, якую дала мне маці»
Пастаноўка паказвае непадзельную сувязь цела і сэксуальнасьці з духоўным станам жанчыны. Спэктакль стаў першым у праекце HomoCosmos. Праект прапануе раскрыць дужкі, каб зрабіць тое, што ў іх схаванае, табу, — тэмай абмеркаваньня, адкрытай дыскусіі, ініцыяванай акторам на сцэне.
У галоўнай ролі — Анастасія Баброва: «Асабіста мяне зачапіла Жанчына. Ня толькі гісторыя гераіні, а сама сутнасьць Жанчыны. Мы думаем, адчуваем, з намі адбываюцца незразумелыя нам самім рэчы, і мы не заўсёды можам імі падзяліцца з розных прычынаў».
Фотарэпартаж з прэм’еры спэктаклю глядзіце тут.
Месца правядзеньня: Менск, Нацыянальны цэнтар сучасных мастацтваў (вул. Някрасава, 3). Пачатак а 19:00. Квіткі каштуюць ад 15 да 20 рублёў.
