Лінкі ўнівэрсальнага доступу

Таджыкістан пазбавіў акрэдытацыі журналістаў Радыё Свабода праз матэрыял пра дачку прэзыдэнта


Шасьцярых супрацоўнікаў бюро «Радыё Свабода» запрасілі ў МЗС Таджыкістана, дзе ім паведамілі, што яны пазбаўленыя афіцыйнай акрэдытацыі.

Кіраўніцтва радыёстанцыі абуранае гэтым крокам уладаў у Душанбэ. У таджыцкай службе «Радыё Свабода» лічаць, што МЗС краіны пайшоў на такі крок з-за публікацыі на сайце матэрыялу аб новым прызначэньні адной з дачок прэзыдэнта Эмамалі Рахмона.

У пятніцу на сайце радыё зьявілася інфармацыя пра прызначэньне трэцяй дачкі таджыцкага лідэра Рухшоны намесьніцай начальніка Упраўленьня міжнародных арганізацый МЗС Таджыкістана. Пры гэтым у навіне гаворыцца, што інфармацыя аб новым прызначэньні дачкі Рахмона першапачаткова зьявілася на сайце МЗС Таджыкістана.

Іншая дачка прэзыдэнта краіны Азода таксама працуе на дзяржслужбе — яна кіруе выканаўчым апаратам кіраўніка дзяржавы.

Як паведамляе «Свабода», таджыцкія ўлады запатрабавалі выдаліць навіну. Пасьля адмовы выканаць гэтае патрабаваньне МЗС Таджыкістана пазбавіў шасьцярых карэспандэнтаў акрэдытацыі.

Паказаць камэнтары

XS
SM
MD
LG