Лінкі ўнівэрсальнага доступу

Ужо сёньня: дзень народзінаў Піліпа Пестрака


Піліп Пестрак

Піліп Пестрак

Падзеі 27 лістапада ў беларускай і сусьветнай гісторыі, а таксама афіша на сёньня.

Дата дня

27 лістапада 1903 году нарадзіўся Піліп Пестрак, беларускі паэт, празаік, публіцыст, крытык. Быў арыштаваны польскімі ўладамі ў 1929 годзе і да 1933 году знаходзіўся ў Гарадзенскай турме.

Максім Танк, Пімен Панчанка, Піліп Пестрак на ІІ зьезьдзе Саюзу пісьменьнікаў СССР. Масква, 1954 год

Максім Танк, Пімен Панчанка, Піліп Пестрак на ІІ зьезьдзе Саюзу пісьменьнікаў СССР. Масква, 1954 год

Пасьля вызваленьня працаваў у Камуністычнай партыі Заходняй Беларусі па Пінскай акрузе, за што быў зноў арыштаваны ў 1934 годзе. Піліп Пестрак быў вызвалены савецкімі ўладамі пасьля паходу Чырвонай Арміі ў Заходнюю Беларусь у верасьні 1939 году.

Таксама ў гэты дзень

1095 — папа Урбан II абвясьціў Сьвятую вайну супраць ісламу на Сьвятой зямлі, што стала ўвядзеньнем Першага крыжовага паходу.

1654 — падчас вайны Расеі з Рэччу Паспалітай расейскія войскі занялі Віцебск.

1859 — у Менску была адкрытая паштова-тэлеграфная станцыя.

1895 — Альфрэд Нобэль падпісаў свой тэстамэнт, паводле якога яго спадчына паступіла ў фонд Нобэлеўскай прэміі.

1920 — Першы Слуцкі полк Беларускай Народнай Рэспублікі ўступіў у бой з бальшавікамі за незалежнасьць Беларусі.

1989 — Вярхоўны Савет СССР санкцыянуе права на эканамічнае самавызначэньне Літвы, Латвіі і Эстоніі.

1996 — у выніку рэфэрэндуму спыненая дзейнасьць Вярхоўнага Савету Рэспублікі Беларусь.

1996 — з тэрыторыі Беларусі быў выведзены апошні эшалён зь ядзернымі ракетамі РС-12М «Топаль».

У гэты дзень нарадзіліся

1874 — Хаім Вэйцман, першы прэзыдэнт Ізраілю, ураджэнец Беларусі.

1900 — Вячаслаў Лаўскі, беларускі грамадзка-палітычны дзяяч.

1921 — Уладзімер Тарасевіч, беларускі уніяцкі біскуп, манах-бэнэдыктынец, доктар тэалёгіі.

1947 — Эдуард Белагураў, беларускі мастак.

1947 — Анатоль Цітоў, беларускі гісторык, геральдык.

1953 — Барыс Грабеншчыкоў, расейскі паэт і музыка.

1960 — Юлія Цімашэнка, украінскі палітык.

У памяці

1895 — памёр францускі пісьменьнік Аляксандар Дзюма-сын.

1932 — памёр Дамінік Сямашка, польскі, беларускі і літоўскі палітычны дзяяч. Выступаў за аднаўленьне ВКЛ у межах на 1772 год са значнай аўтаноміяй для беларусаў. Быў зьвязаны зь віленскімі масонскімі ложамі «Літва» і «Беларусь».

Дамінік Сямашка

Дамінік Сямашка

1938 — у Менску быў расстраляны Сымон Рак-Міхайлоўскі, беларускі публіцыст і палітычны дзяяч. У 1922 годзе Рак-Міхайлоўскі быў абраны дэпутатам сэйму Другой Рэчы Паспалітай ад Блёку Нацыянальных Меншасьцяў, зьяўляўся сябрам Таварыства беларускай школы.

Сымон Рак-Міхайлоўскі

Сымон Рак-Міхайлоўскі

1990 — памёр Восіп Любіч, францускі мастак беларускага паходжаньня.

«Пэйзаж з чырвоным дахам» Восіпа Любіча на паштовай марцы Беларусі, 2015 год

«Пэйзаж з чырвоным дахам» Восіпа Любіча на паштовай марцы Беларусі, 2015 год

Што будзе

Экскурсія шляхамі Максіма Багдановіча

Сёлета спаўняецца 125 год са дня нараджэньня Максіма Багдановіча. Ён нарадзіўся 9 сьнежня 1891 году (27 лістапада па старым стылі). «Усе мы разам ляцім да зор», — так называецца экскурсія па Менску, дзе беларускі клясык пакінуў свой сьлед. Завершыцца падарожжа ў Літаратурным музэі Багдановіча батлеечным спэктаклем і сьвяточным канцэртам.

Сувораўцы на сьвяткаваньні 120-годзьдзя Максіма Багдановіча. Менск, 2011 год

Сувораўцы на сьвяткаваньні 120-годзьдзя Максіма Багдановіча. Менск, 2011 год

Месца збору: Менск, каля помніка Максіму Багдановічу (Тэатар опэры і балета Рэспублікі Беларусь, пл. Парыскай Камуны, 1).

Экскурсія пачнецца а 14:30. Квіток на экскурсію каштуе 8 рублёў.

Канцэрт украінскага гурту «Колір»

Украінскі гурт «Колір» працягвае свае гастролі па Беларусі і выступіць 25 лістапада ў Віцебску. Напрыканцы лета музыкі з Адэсы выдалі альбом «Хто, як не ми».

Месца правядзеньня: Віцебск, Beatles club (вул. Кастрычніцкая, 12).

Пачатак а 20:30. Квіткі каштуюць 4-6 рублёў.

Канцэрт Зьмітра Вайцюшкевіча ў Празе

Зьмітра Вайцюшкевіча, канцэрты якога негалосна забароненыя ў Беларусі, можна будзе паслухаць у Празе. Апошні альбом Зьмітра Вайцюшкевіча «Камета» быў напісаны на словы чэскага паэта і музыкі Яраміра Нагавіцы.

Месца правядзеньня: Прага, Craft House Prague (Navrátilova 1421/11).

Пачатак а 19-й гадзіне. Квіткі каштуюць 200 чэскіх крон.

Паказаць камэнтары

XS
SM
MD
LG