Канфэрэнцыя, якая праводзіцца з 1997 году Нямецка-беларускім таварыствам, будзе прысьвечаная тэме «Беларусь — Нямеччына — ЭЗ. Пэрспэктывы эўрапейскага суседзтва і бясьпекі».
У цэнтры ўвагі XIV Менскага форуму — адносіны паміж Беларусьсю, Нямеччынай і Эўразьвязам, пэрспэктывы рэгіянальнага супрацоўніцтва ў Эўропе, асаблівасьці эканамічных рэформаў у Беларусі, а таксама магчымасьці ўдзелу грамадзянскай супольнасьці ў разьвіцьці Беларусі.
«Нам было важна, каб Менскі форум працягнуў сваю працу менавіта цяпер, калі мы назіраем новыя выклікі ў зьнешняй палітыцы і пытаньнях бясьпекі ў Эўропе і адначасова збліжэньне паміж Беларусьсю і Эўразьвязам», — адзначыў Райнэр Лінднэр, старшыня Менскага форуму і Нямецка-беларускага таварыства. — «Крэда Менскага форуму застаецца нязьменным і празь 19 гадоў пасьля яго заснаваньня: адкрыты і сумленны дыялёг».
Сьпікеры на адкрыцьці канфэрэнцыі — намесьніца міністра замежных спраў Рэспублікі Беларусь Алена Купчына і кіраўніца прадстаўніцтва ЭЗ у Беларусі Андрэа Віктарын, паведамляе ibb-minsk.by. Форум будзе працаваць з 24 па 26 лістапада.
