Лінкі ўнівэрсальнага доступу

Ужо сёньня: 20 гадоў таму ў Беларусі адбыўся рэфэрэндум аб зьмене Канстытуцыі


Падзеі 24 лістапада ў беларускай і сусьветнай гісторыі, а таксама афіша на сёньня.

Дата дня

24 лістапада 1996 году адбыўся рэфэрэндум, ініцыяваны Аляксандрам Лукашэнкам дзеля ўнясеньня зьменаў у Канстытуцыю. На рэфэрэндуме таксама падымаліся пытаньні аб прыватнай уласнасьці на зямлю і пра перанос Дня Незалежнасьці на 3 ліпеня.

Таксама ў гэты дзень

1729 — у Пінску ордэн езуітаў заснаваў друкарню.

1793 — падчас Вялікай францускай рэвалюцыі «Марсэльеза» была выбраная гімнам Францыі.

1859 — выйшла ў сьвет кніга Чарльза Дарвіна «Аб паходжаньні відаў» з выкладаньнем тэорыі эвалюцыі жывёльнага сьвету

«Дарвін ператвараецца ў малпу», брытанская карыкатура на тэорыю дарвінізму 1870-я гады
«Дарвін ператвараецца ў малпу», брытанская карыкатура на тэорыю дарвінізму 1870-я гады

1934 — прэзыдэнту Турэччыны Мустафу Кемаль-пашу быў нададзены ганаровы тытул «Атацюрк» («бацька туркаў»).

1963 — у будынку паліцыі Даласу быў забіты Лі Гарві Освальд, меркаваны забойца Джона Кенэдзі.

1997 — уладамі была закрытая газэта «Свабода». Першы нумар яе выйшаў 25 сакавіка 1990 году, у гадавіну ўтварэньня Беларускай Народнай Рэспублікі. Рэдакцыя выданьня стаяла на нацыянальна-дэмакратычных пазыцыях, крытычна ставілася да асобы Аляксандра Лукашэнкі і яго паплечнікаў.

2011 — быў вынесены прысуд Алесю Бяляцкаму, старшыні праваабарончага цэнтру «Вясна». Бяляцкі атрымаў 4,5 года зьняволеньня паводле абвінавачаньня ва ўтойваньні прыбыткаў з-за мяжы. Алесь Бяляцкі сваёй віны не прызнаў і тлумачыў суду, што атрыманыя грошы ішлі на дапамогу пацярпелым ад рэпрэсій. Алесь Бяляцкі быў вызвалены ў чэрвені 2014 году.

Алесь Бяляцкі ў судовай залі, лістапад 2011 году
Алесь Бяляцкі ў судовай залі, лістапад 2011 году

У гэты дзень нарадзіліся

1714 — Тамаш Жаброўскі, беларускі архітэктар.

1916 — Георгі Бенядыктаў, заслужаны архітэктар БССР. Асноўныя працы Бенядзіктава ў Менску: будынак Белдзяржфілярмоніі, Палац культуры Мінскага трактарнага заводу, стары будынак музэю гісторыі Вялікай Айчыннай вайны.

Стары будынак музэю гісторыі Вялікай Айчыннай вайны, архітэктар Георгі Бенядзіктаў
Стары будынак музэю гісторыі Вялікай Айчыннай вайны, архітэктар Георгі Бенядзіктаў

1943 — Віктар Сідзяк, беларускі фэхтавальшчык, чэмпіён Алімпійскіх гульняў у Мэхіка і Мюнхэне, пяціразовы чэмпіён сьвету.

У памяці

1943 – загінуў Мікалай Азбукін, беларускі географ і дзяяч беларускага нацыянальнага руху. У сваёй кнізе «Геаграфія Эўропы» Азбукін трактаваў Беларусь як «самадастатковую краіну».

Перасьледаваўся НКВД у справе «Саюзу вызваленьня Беларусі». Імаверна быў расстраляны нібыта за спробу перайсьці мяжу на поўдні СССР.

1991 — памёр Фрэдзі Мэрк’юры, брытанскі сьпявак, саліст гурту Queen. За дзень да сьмерці музыка пацьвердзіў чуткі пра сваё захворваньне на СНІД.

Што будзе сёньня

Мікалай Статкевіч і Ўладзімер Някляеў плянуюць правесьці мітынг, прысьвечаны «20-годзьдзю антыканстытуцыйнага перавароту» — рэфэрэндуму 1996 году.

Месца правядзеньня: Менск, пл. Свабоды. Пачатак а 18-й гадзіне.

Імпрэзы і выставы

«Сьнежны чалавек у Менску»

Адна зь ілюстрацыяў Кацярыны Дубовік да кнігі
Адна зь ілюстрацыяў Кацярыны Дубовік да кнігі

Швэдзкая пісьменьніца Эва Суса напісала кнігу для дзяцей аб прыгодах Сьнежнага чалавека ў беларускай сталіцы. Арганізатары імпрэзы ў Саюзе беларускіх пісьменьнікаў абяцаюць шмат цікавінак як для дзетак, так і для бацькоў.

Месца правядзеньня: Менская абласная бібліятэка імя Пушкіна (вул. Гікалы, 4). Пачатак а 18:00. Уваход вольны.

Прэзэнтацыя кнігі Рышарда Капусьцінскага «Чорнае дрэва. Афрыканская ліхаманка»

Народжаны ў беларускім Пінску Рышард Капусьцінскі — легенда польскай рэпартажнай журналістыкі, вандроўнік і пісьменьнік. Яго кніга — пра крывавыя рэвалюцыі, выпадковыя перамогі і паразы, расавы антаганізм, голад, эпідэміі, карупцыю, галечу. Прэзэнтацыя адбудзецца з удзелам сакратаркі пісьменьніка Бажэны Дудко і паэта Андрэя Хадановіча.

Месца правядзеньня: Менск, Галерэя ТUT.BY (пр. Дзяржынскага, 57, 9-ты паверх). Пачатак а 19-й.

Кірмаш праектаў у Маладэчне

Кірмаш праектаў — гэта конкурс ідэяў кампаніі «Будзьма беларусамі», з дапамогай якога ініцыятыўныя людзі знаходзяць партнэраў для ўвасабленьня задумы. Цягам месяца на плятформе Talaka.by зьбіраліся і абмяркоўваліся ідэі. Цяпер аўтары праектаў маюць магчымасьць прэзэнтаваць свае задумы шырокай публіцы.

Месца правядзеньня: Маладэчна, адукацыйны цэнтар «Адкрытая прастора» (вул. Валынца, 12б). Пачатак а 18:00. Уваход вольны.

Прэзэнтацыя новага альбому гурту Botanic Project

Пакуль вакаліст беларускага рэгі-гурту Botanic Project сядзіць у турме, яго калегі выдалі свой пяты альбом. У студыйную работу ўвайшла песьня «А хто там ідзе?», дзе музыкі спалучылі паэзію Янкі Купалы і музыку Боба Марлі.

Месца правядзеньня: Менск, бар Beer&Wine (вул. Кульман, 9). Пачатак а 19:00. Квіткі каштуюць 17-20 рублёў.

Выстава карыкатур на тэму клімату

У гарадзенскай выставачнай залі адкрылася швэдзка-беларуская выстава карыкатур «Сам-насам з кліматам». Выстава праходзіць у межах праекту Швэдзкага інстытуту, які распачаўся ў 2010 годзе і толькі цяпер даехаў да Беларусі.

З альбому «Сам-насам з кліматам»
З альбому «Сам-насам з кліматам»

Месца правядзеньня: Выставачная заля Горадні (вул. Ажэшкі, 43). Выстава працуе да 18 сьнежня.

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG