Эўрапейскі парлямэнт прыняў 22 лістапада рэзалюцыю, у якой прапануецца выдаткаваць на абарону 2% ВУП і самастойна дзейнічаць у крызісных сытуацыях там, дзе NATO ня хоча ці ня можа браць удзел, праз штаб кіраваньня шматнацыянальнымі войскамі.
Сытуацыя зь бясьпекай у Эўропе значна пагоршылася ў апошнія гады праз тэрарызм, гібрыдныя пагрозы, кібэрпагрозы і энэргетычныя пагрозы, гаворыцца ў рэзалюцыі. Ніводная краіна ня можа процістаяць ім у адзіночку, таму парлямэнтарыі хочуць хуткага і супольнага адказу на пагрозы.
Эўрапарлямэнт заклікаў краіны Эўразьвязу ўзмацніць каардынацыйную ролю Эўрапейскага агенцтва абароны, праводзіць супольныя закупы абарончых рэсурсаў, дзяліцца тэхнікай. Раду Эўропы заклікаюць прыняць агульную абарончую палітыку і даць фінансаваньне на ейнае выкананьне.
Рэзалюцыя ня мае дырэктыўнага характару, яна не загадвае краінам Эўропы стварыць аб’яднанае войска. Але падобныя ідэі гучаць ужо даўно, загучалі з новай сілай пасьля заяваў Дональда Трампа пра тое, што ён «ня супраць» развалу NATO ў цяперашняй форме саюзу.
У верасьні стварыць пастаяннае супольнае войска Эўропы прапаноўвала Італія, а Францыя і Нямеччына прапаноўвалі ўтварыць эўрапейскі вайсковы камандны цэнтар, ды іншыя краіны вырашылі абмежавацца меншымі мерамі.
Вялікая Брытанія адкрыта выступіла супраць аб’яднанага войска Эўропы. Ідэя таксама не падабаецца Швэцыі, Аўстрыі і Ірляндыі.
