Лінкі ўнівэрсальнага доступу

logo-print

Эўразьвяз гатовы да адкрытага, але крытычнага дыялёгу зь Беларусьсю


Дэлегацыя Эўразьвязу падкрэсьліла гатоўнасьць ЭЗ да падтрыманьня адкрытага, але крытычнага дыялёгу зь Беларусьсю.

Пра гэта паведамляе Прадстаўніцтва Эўрапейскага зьвязу ў Беларусі па выніках візыту ў Менск дэлегацыі Камітэту па палітыцы і бясьпецы.

Як гаворыцца ў паведамленьні, падчас сустрэчаў у Менску 21 лістапада віталася станоўчая тэндэнцыя ў адносінах ЭЗ і Беларусі.

«Эўразьвяз адкрыты да далейшага разьвіцьця адносінаў паміж ЭЗ і Беларусьсю і далейшых крокаў па актывізацыі ўдзелу ЭЗ і галіновага супрацоўніцтва. Але падкрэсьліў, што адносіны павінны грунтавацца на агульных каштоўнасьцях, асабліва на захаваньні правоў чалавека, дэмакратыі і вяршэнства права, а таксама на тым, што тычыцца пытаньня сьмяротнага пакараньня. Такім чынам, канкрэтныя крокі з боку Беларусі да захаваньня ўнівэрсальных асноўных свабодаў, вяршэнства права і правоў чалавека будуць мець ключавое значэньне ў фармаваньні будучай палітыкі ЭЗ у адносінах да Беларусі».

Дэлегацыя складалася з абмасадараў Камітэту па палітыцы і бясьпецы з усіх дваццаці васьмі краінаў ЭЗ, а таксама з прадстаўнікоў Эўрапейскай службы зьнешніх дзеяньняў і Эўрапейскай камісіі. Яна правяла сустрэчы з кіраўніком Беларусі Аляксандрам Лукашэнкам, міністрам замежных спраў Уладзімерам Макеем, а таксама з прадстаўнікамі беларускай палітычнай апазыцыі і грамадзянскай супольнасьці, праваабаронцамі.

Камітэт па палітыцы і бясьпецы складаецца з амбасадараў краін ЭЗ, якія працуюць у Брусэлі. Гэта сталая структура Рады ЭЗ. Камітэт мае ключавую ролю ў замежнай палітыцы і палітыцы бясьпецы ЭЗ і ў палітычным дыялёгу.

XS
SM
MD
LG