Афіша:
У Культурніцкай прасторы «Тартак» (Менск, вул. Магілёўская, 2) пройдзе прэзэнтацыя зборніка «Песьні тралейбусных рагуляў» Уладзіслава Гарбацкага. Пачатак а 16.00.
У менскім Палацы мастацтва адбудзецца прэзэнтацыя каталёгу «Тутэйшы дызайн. Асобы. Рэчы» Беларускага саюза дызайнэраў. Пачатак а 17.00.
У кавярні «Ўтопія 60» (Менск, пр. Леніна, 3) пройдзе сустрэча зь Сяргеем Пукстам, кампазытарам, музыкам, паэтам і перакладчыкам. Пачатак а 19.00.
У гісторыі:
1190 — падчас Трэцяга крыжовага паходу ў Палестыне быў заснаваны Тэўтонскі ордэн (поўная назва: Ордэн тэўтонскіх рыцараў шпіталя Сьв. Марыі ў Ерусаліме).
1784 — у вёсцы Волька на Падляшшы нарадзіўся Міхал Баброўскі, славіст і ўсходазнавец, філёзаф, уніяцкі і праваслаўны сьвятар, які спрыяў узьнікненьню беларусазнаўства, першы беларускі скарыназнаўца, прафэсар Віленскага ўнівэрсытэту. Адкрыў і апісаў «Супрасьлеўскі кодэкс», найбольш значны стараславянскі кананічны рукапіс.
1908 — У вёсцы Шані на Пружаншчыне нарадзіўся Мікола Засім, беларускі паэт.
1942 — савецкія войскі пачалі контрнаступ пад Сталінградам.
У памяці:
1557 — памерла Бона Сфорца, польская каралева і вялікая княгіня літоўская, другая жонка Жыгімонта І Старога. Бона Сфорца шмат зрабіла для разьвіцьця беларускіх земляў і дзеля збліжэньня Беларусі з Заходняй Эўропай. З ініцыятывы каралевы Боны была праведзеная вялікая аграрная рэформа.
2007 — памёр Язэп Сажыч, беларускі грамадзка-палітычны дзяяч, у 1982-1997 гадах старшыня Рады БНР.
2008 — памёр Алег Лойка, беларускі паэт, пісьменьнік і літаратуразнаўца.
Цытата:
«Ніхто са мной так радасьці ня дзеліць,
Як жаўранак, і ціхі васілёк,
I ветрык, што дымкі з дамоў кудзеліць,
I лес, што кліча пошумам здалёк.
Ніхто са мной і гора так не дзеліць,
Як зоры ў векавечнай вышыні,
Лугі пад беласьнежнаю пасьцеляй,
Дарогі ў задуменьні жытніх ніў.
Сьпявай, жаўрук!.. Квітней, мая валошка!..
Шумі, мой бор, да болю дарагі!..
Найменшая кузюрынка і мошка,
Вітайце, як найбольшыя багі!
Апальвай, сонца, плечы мне і грудзі,
Віхор, у твар адкрыты вечна дзьмі!..
Пакуль дзяліць мы з вамі радасьць будзем,
Пакуль дзяліць мы з вамі гора будзем,
Паэтамі мы будзем і людзьмі!»
Алег Лойка
