Мы атрымліваем асалоду ад смажанай гародніны — асабліва калі яна прыгожа пацямнела і стала хрусткаю. Але застаецца пытаньне — ці здарова гэта і ці не ліквідуе гэта перавагі для здароўя? Адказ на гэтае пытаньне спрабуе даць сайт газэты The New York Times.
Дыетолягі запэўніваюць, што нягледзячы на тое, што высокая тэмпэратура прыгатаваньня пры смажаньні мяняе пажыўны профіль гародніны і можа паставіць пад пагрозу некаторыя пажыўныя рэчывы, багацьце на клятчатку і мінэралы, а таксама яе нізкая калярыйнасьць пераважаюць шкоды ад смажаньня.
«Калі смажаньне гародніны можа перашкаджаць людзям яе есьці, я б усё ж параіла есьці і смажаную гародніну», — сказала Эліс Ліхтэнштэйн, дырэктарка лябараторыі Навукова-дасьледчага цэнтру харчаваньня і праблемаў старэньня чалавека Ўнівэрсытэту Тафтса ў Бостане.
Гатаваньне гародніны прыводзіць да зьніжэньня ўзроўню некаторых пажыўных рэчываў, асабліва водарастваральных вітамінаў, такіх як вітамін С, і некаторых вітамінаў групы В. Але гэта кампраміс, таму што гатаваньне ежы можа таксама зрабіць некаторыя пажыўныя рэчывы лягчэйшымі для засваеньня нашым целам. Прыгатаваныя памідоры, напрыклад, забясьпечваюць больш высокі ўзровень лікапіну, які вельмі карысны для сардэчна-судзіннай сыстэмы, а вараная морква мае больш высокія ўзроўні каратыноідаў, багатых на антыаксыданты.
«Перагрэў разбурае пажыўны склад алею, мяняе смак і вызваляе шкодныя свабодныя радыкалы, — кажа Лесьлі Бэк, дыетоляг з Таронта, — А калі вы выкарыстоўваеце аліўкавы алей, які, як вядома, мае фітахімічныя супрацьзапаленчыя якасьці, высокая тэмпэратура іх зьнішчыць».
У рэшце рэшт дыетолягі прапануюць кампрамісны спосаб прыгатаваньня гародніны: час, які расьлінная ежа падвяргаецца ўзьдзеяньню высокай тэмпэратуры, павінен быць кароткім. Іншымі словамі смажце гародніну, але ня доўга. Гэта відаць самы лепшы спосаб прыгатаваць ежу і захаваць у ёй пажыўныя рэчывы — сказаў Лібі Мілс, прэсавы сакратар амэрыканскай Акадэміі харчаваньня і дыетоляг.
