Лінкі ўнівэрсальнага доступу

Амэрыканскі дыплямат: «У Беларусі і выбару ўжо няма: альбо адаптавацца, альбо адстаць безнадзейна»


Часовы павераны ў справах ЗША ў Беларусі Робэрт Райлі

Часовы павераны ў справах ЗША ў Беларусі Робэрт Райлі

Часовы павераны ў справах ЗША ў Беларусі Робэрт Райлі выступіў на Кастрычніцкім эканамічным форуме, які праходзіць у Менску.

«Трэба больш кантактаваць, важна зьбіраць людзей у розныя групы — прыватны бізнэс, амбасады, арганізацыі. І гэты форум — прыклад такіх зносінаў. Учора мы пачулі шмат дакладаў пра ўмовы, якія ўплываюць на рост эканомікі.

У ЗША ў межах зьнешняй палітыкі прасоўваюцца ідэі павышэньня агульнага дабрабыту. Няма асобна зьнешняй палітыкі ад агульнай палітыкі, асобна эканамічнай палітыкі ад зьнешняй палітыкі. Мы пра гэта ў Дзярждэпартамэнце гаворым пастаянна. Зьнешняя палітыка — гэта эканамічная палітыка. Учора мой калега з Эўразьвязу спрабаваў знайсьці правільнае слова, якім можна назваць рэформы альбо зьмены. Гэта адаптацыя.

Мне спадабалася слова «адаптацыя». На фоне глябалізацыі ў вас ужо і выбару няма: альбо адаптавацца, альбо адстаць безнадзейна. Мы ўчора слухалі пра розныя сілы і фактары, якія пагаршаюць сытуацыю. Сёньня мы пагаворым пра тое, што адбываецца ў Беларусі, якія фактары дазваляюць вам уплываць на глябальныя працэсы.

Я тут знаходжуся толькі 2 месяцы, але ўжо актыўна кантактую зь міністэрствамі. Я разумею, што Беларусь не павінна адставаць, што Беларусі неабходна адаптавацца.

Робэрт Райлі на Кастрычніцкім эканамічным форуме

Робэрт Райлі на Кастрычніцкім эканамічным форуме

Усясьветны банк выпусьціў справаздачу, зь якой вынікае, што Беларусь імкнецца да прагрэсу, і я ў вашых міністэрствах чуў, што, паводле гэтага рэйтынгу, Беларусь прасоўваецца ўгору стабільна. Гэта тое месца, дзе можна весьці бізнэс.

Імідж, безумоўна, вельмі важны, і Беларусь ужо шмат зрабіла дзеля свайго іміджу. Але трэба зрабіць яшчэ больш.

Я быў зьдзіўлены, калі прыехаў сюды два месяцы таму. Калегі па амбасадзе спыталіся: а чаго ты чакаў? Я адказаў, што я нават і ня ведаў, чаго чакаць. Многія, хто думае пра інвэстыцыі ў Беларусь, хто ўваходзіць у інвэстыцыйныя фонды, камітэты, вымушаныя сачыць за навінамі за апошнія гадоў 10–15, але гэта ўсё састарэлая інфармацыя. Імідж надзвычай важны ў сучасным глябальным сьвеце, і вам трэба найхутчэй адаптавацца.

Я шмат гутарыў з калегамі, што трэба рабіць, каб зьмяніць імідж Беларусі. Чым хутчэй ён зьменіцца, тым хутчэй пойдуць замежныя інвэстыцыі. Я ня ведаю, якія даць парады цяпер. Але многія з вас ведаюць, што трэба рабіць зараз.

Урад можа хутка прыняць рашэньні, гэта складаныя рашэньні. І якраз з гэтай прычыны яны магчымыя.

Калі гаворка ідзе пра малы і сярэдні бізнэс, то ў ЗША гэта 60% новых працоўных месцаў з 1960-х — 1970-х гадоў. Гэта вялізная лічба. Але гэта істотны фактар. Вельмі вялікія грошы прыходзяць у прыватны бізнэс звонку. Пытаньне стаіць пра рызыкі, пытаньне стаіць пра юрыдычную сыстэму, якая павінна быць стабільная на доўгі тэрмін.

Калі я хаджу на падобныя канфэрэнцыі, а іх было шмат за апошнія 20 гадоў, часьцяком я вяртаюся і кажу калегам: «Ды нічога, нармальна». І забываюся пра іх. Трэба дамагчыся, каб не было такіх уражаньняў пасьля гэтай канфэрэнцыі, ня важна, дзе вы працуеце — у прыватным бізнэсе, ва ўрадзе. Трэба нешта рабіць, каб паляпшаць імідж. Мы можам дапамагчы, Амэрыка можа дапамагчы. Але нам патрэбныя інструмэнты, каб у нас былі аргумэнты ў размовах зь іншымі краінамі. Таму, вярнуўшыся на працоўныя месцы, падумайце, што можаце зрабіць вы, каб працэс пайшоў наперад і не спыняўся дзень за днём. І я перакананы, што адаптацыя, зьмены могуць замацавацца. І сапраўды Беларусь можа ўдзельнічаць паўнавартасна ва ўсясьветнай эканоміцы».

Паказаць камэнтары

XS
SM
MD
LG