Лінкі ўнівэрсальнага доступу

За сатырычную карцінку з «Пушкіным» і «Цесаком» расейцу далі год калёніі


Фрагмэнт партрэту Аляксандра Пушкіна аўтарства Яўгенія Усьцінава

Фрагмэнт партрэту Аляксандра Пушкіна аўтарства Яўгенія Усьцінава

Дваццацігадовага жыхара маскоўскай акругі Зяленаград Яўгенія Корта прызналі вінаватым паводле крымінальнага артыкулу за распальваньне нянавісьці альбо варожасьці з-за публікацыі на яго старонцы «Вконтакте» сатырычнай карцінкі.

Зяленаградзкі раённы суд прысудзіў яго да году пазбаўленьня волі ў калёніі-пасяленьні, перадае расейскі тэлеканал «Дождь».

На карцінцы чалавек, падобны да расейскага нэанацыста Максіма Марцінкевіча па мянушцы Цясак, нападае на іншага чалавека, падобнага да знакамітага расейскага паэта Аляксандра Пушкіна, і зьневажае таго. Карцінку найхутчэй можна інтэрпрэтаваць, як іронію з расейскіх нацыстаў, якія не прызналі б Пушкіна за расейца празь ягоныя афрыканскія карані.

Паводле вэрсіі сьледзтва, апублікаваны малюнак «прыніжае групу асоб па прынцыпах нацыянальнасьці». У абвінаваўчым заключэньні гаворыцца, што на малюнку намаляваная «канфліктная сытуацыя» паміж людзьмі, падобнымі на Марцінкевіча і Пушкіна. Згодна з праведзенай у рамках расьсьледаваньня экспертызай, малюнак зьмяшчае «сукупнасьць псыхалягічных і лінгвістычных прыкмет прыніжэньня нярускіх».

Сам асуджаны казаў, што не публікаваў малюнак, а выпадкова захаваў яго ў альбоме на сваёй старонцы.

XS
SM
MD
LG