Прэзыдэнт Кіргізстану Алмазбек Атамбаеў падпісаў закон аб правядзеньні 11 сьнежня рэфэрэндуму па зьменах у Канстытуцыю. Пра гэта паведамілі ў яго прэс-службе.
Напярэдадні адпаведны закон ухваліў парлямэнт Кіргізстану. Канстытуцыйная палата Вярхоўнага суду ў сваім заключэньні да законапраекту вырашыла, што дакумэнт не супярэчыць фундамэнтальным правам і свабодам чалавека і грамадзяніна, дапушчальнасьці іх абмежаваньняў, прынцыпам дэмакратычнай, прававой, сьвецкай дзяржавы.
Паводле паправак, большыя паўнамоцтвы ў Кіргізстане мае атрымаць прэм’ер-міністар краіны. Шэраг апазыцыйных палітыкаў, грамадзкіх дзеячаў і праваабаронцаў выступаюць супраць гэтых паправак. Крытыкі прэзыдэнта Атамбаева кажуць, што такім чынам ён хоча працягнуць сваё знаходжаньне ва ўладзе. Ягоны прэзыдэнцкі тэрмін завяршаецца ў наступным годзе, а Канстытуцыя забараняе яму балятавацца яшчэ раз.
