Лінкі ўнівэрсальнага доступу

Ініцыятыва «Хайсы» ўшанавала памяць ахвяраў сталінскіх рэпрэсіяў пад Віцебскам


Крыж у лесе каля вёскі Хайсы
Крыж у лесе каля вёскі Хайсы

Назва ініцыятывы паходзіць ад вёскі ў Віцебскім раёне, каля якой у лістападзе 2014 году знайшлі чалавечыя парэшткі — косткі і чарапы з кулявымі адтулінамі.

Народны мэмарыял, зроблены віцебскімі актывістамі
Народны мэмарыял, зроблены віцебскімі актывістамі

Сябар КХП БНФ Ян Дзяржаўцаў апытаў мясцовых старажылаў, і многія ўзгадалі пачутыя ад старэйшых страшныя аповеды пра тое, як у лес каля Хайсоў у 1937–1939 гадах прывозілі на машынах людзей і тут расстрэльвалі.

Больш за год Ян Дзяржаўцаў і ягоныя аднадумцы вялі перапіску зь мясцовым сельсаветам, Сьледчым камітэтам і міліцыяй, патрабуючы дасьледаваньняў у гэтых мясьцінах. Старшыня Мазалаўскага сельсавету Леанід Дубіна выклікаў на месца пошукавы батальён, і вайскоўцы эксгумавалі косткі і чарапы зь вялікіх ямін. Было відавочна, што раней тут дзейнічалі «чорныя капальнікі», але іх не цікавілі ні людзкія парэшткі, ні фрагмэнты адзеньня і абутку — таму іх пакідалі, дзе знайшлі.

Падыходы да гэтага месца цяпер пазначаны ўказальнікамі
Падыходы да гэтага месца цяпер пазначаны ўказальнікамі

Вайскоўцы з пошукавага батальёну сабралі ўсё знойдзенае ў некалькі цыратавых мяхоў і вывезьлі ў невядомым кірунку. Актывісты доўгі час ня ведалі, што сталася з чалавечымі парэшткамі — да тае пары, пакуль з тыдзень таму раённая газэта «Голас Прыдзьвіньня» не надрукавала артыкул пра перапахаваньне. Аказалася, што косьці і чарапы зь «віцебскіх Курапатаў» пахавалі як парэшткі «ахвяраў вайны». Нібыта да такіх высноваў прыйшлі вайсковыя археолягі, што праводзілі раскопкі.

Напярэдадні Дзядоў актывісты ўсталявалі новыя крыжы
Напярэдадні Дзядоў актывісты ўсталявалі новыя крыжы

Аднак зь іхнай справаздачай актывістаў так і не пазнаёмілі ў поўным абʼёме — паказалі толькі некалькі аркушаў. Там гаворыцца, што былі знойдзены фрагмэнты мужчынскага і жаночага адзеньня ды абутку, колькі манэт, датаваных 1930-мі гадамі. Сярод высноваў, якія актывістам усё-ткі паказалі, было й сьцьверджаньне, што час і прычыну сьмерці людзей, чые парэшткі знайшлі пад Хайсамі, вызначыць немагчыма.

«Пра перапахаваньне, якое адбылося на брацкіх могілках каля чыгуначнай станцыі Лосьвіда, нам нават не паведамілі. Я перадаў аргкамітэту, створанаму мясцовымі ўладамі, адрасы ўсіх апытаных мной людзей, якія сьведчылі пра тое, што ў лесе пад Хайсамі адбываліся „сталінскія“ расстрэлы. Але аргкамітэт, які апекаваўся справай са знойдзенымі ў лесе парэшткамі, вырашыў усё сьпісаць на вайну і чарговы раз замаўчаць злачынствы НКВД у Беларусі», — кажа Ян Дзяржаўцаў.

На кожны крыж павязалі стужку зь беларускім арнамэнтам
На кожны крыж павязалі стужку зь беларускім арнамэнтам

Спадар Дзяржаўцаў перакананы, што на ўзьлеску каля вёскі Хайсы засталося яшчэ шмат безыменных магілаў, дзе ляжаць ахвяры сталінскіх рэпрэсій. Таму віцебскія актывісты ўсталявалі ў гэтых мясьцінах яшчэ некалькі мэмарыяльных крыжоў — цяпер іх ужо больш за дзясятак.

Каля крыжоў запалілі сьвечкі
Каля крыжоў запалілі сьвечкі

На крыжы павязалі стужкі зь беларускім арнамэнтам, пад імі запалілі сьвечкі. А ўздоўж лясной сьцежкі, якая вядзе да раскапаных ямаў, паставілі адмысловыя ўказальнікі. Каб кожны, хто выпадкова або адмыслова сюды трапіць, адразу разумеў: гэта мэмарыяльнае месца. Зрэшты, віцебскія актывісты спадзяюцца, што некалі тут будзе і сапраўдны мэмарыял.

Цяпер гэтае мэмарыяльнае месца можа знайсьці кожны ахвотны
Цяпер гэтае мэмарыяльнае месца можа знайсьці кожны ахвотны

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG