Лінкі ўнівэрсальнага доступу

«Стары Ольса» плянуе адрадзіць батлеечную традыцыю


Выступ гурту «Стары Ольса» на Фэстывалі рэнесанснай музыкі ў Мінэсоце, ЗША, 2016
Выступ гурту «Стары Ольса» на Фэстывалі рэнесанснай музыкі ў Мінэсоце, ЗША, 2016

Беларускі гурт сярэднявечнай музыкі «Стары Ольса» працуе над новым альбомам, які будзе заснаваны на рыцарскіх бяседных песьнях.

Як паведамляе БелаПАН, пра творчыя пляны гурту на адкрытай сустрэчы з музыкамі 25 кастрычніка ў сталічным бары Beer & Wine расказала флейтыстка Марыя Шарый.

Паводле яе, «Стары Ольса» атрымлівае запрашэньні ад арганізатараў многіх эўрапейскіх фэстываляў, у тым ліку ў Італіі і на Азорскіх астравах. «Намі зацікавіліся нават у Кітаі», — адзначыла Шарый.

Адмаўляцца ад запісу новага альбому праз шчыльны гастрольны графік музыкі не зьбіраюцца.

«Калі заплянавана шмат паездак, часу на запіс застаецца мала, але мы будзем чаргаваць канцэрты і запіс альбому», — патлумачыла флейтыстка. Яе калега Алесь Чумакоў, які ў гурце грае на струнных інструмэнтах, паведаміў, што матэрыял для новага альбому ўжо гатовы.

Выступ «Старога Ольсы» на Фэстывалі рэнесанснай музыкі ў Мінэсоце
Выступ «Старога Ольсы» на Фэстывалі рэнесанснай музыкі ў Мінэсоце

Шарый таксама паведаміла, што калектыў марыць пачаць музычна-візуальны праект з выкарыстаньнем традыцыйнай беларускай батлейкі.

«Мы ўжо набылі шафу для батлейкі, і сёньня хочам адрадзіць некалькі традыцыйных спэктакляў, якія б гучалі з нашымі інструмэнтамі, нашай музыкай і інтэрмэдыямі», — сказала Марыя.

Гурт «Стары Ольса» быў заснаваны ў 1999 годзе. За гэты час калектыў выпусьціў 12 рэлізаў, сярод якіх студыйныя і канцэртныя альбомы, музычныя зборнікі. Апошні студыйны альбом пад назвай Medieval Classic Rock, у якім сабраны «сярэднявечныя» кавэр-вэрсіі замежных рок-гітоў, гурт выдаў сёлета дзякуючы пасьпяховай краўдфандынгавай кампаніі на плятформе Kickstarter. Замест неабходных 7 тысяч даляраў музыкі сабралі каля 30 тысяч, што дазволіла ім у канцы лета — пачатку восені зладзіць вялікі гастрольны тур па ЗША.

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG