Сырыйская група маніторынгу правоў чалавека, якая базуецца ў Лёндане паведаміла, што прынамсі восем чалавек былі забітыя ў раёнах Бустан аль-Каср і Фардас ў абложаным Алепа, дзе ў пастцы застаюцца каля 250 тысяч чалавек.
Кіраўнік групы маніторынгу паведаміў, што гэта самае інтэнсіўнае бамбаваньне, што адбылося пасьля таго, як сырыйскі рэжым абяцаў скараціць колькасьць авіяналётаў.
5 кастрычніка прадстаўнікі ўзброеных сіл прэзыдэнта Сырыі Башара Асада заявілі, што скароцяць бамбардзіроўкі ўсходняга Алепа і заклікалі цывільнае насельніцтва дыстанцыявацца ад ваяўнікоў. Пры падтрымцы расейскіх паветраных удараў сырыйскія ўрадавыя сілы прасунуліся ў раёны, якія ўтрымліваюць паўстанцы.
Сырыйскія праваабаронцы паведамляюць, што па меншай меры 290 чалавек, у асноўным мірных грамадзян, былі забітыя ўрадавымі або расейскімі паветранымі ўдарамі пасьля 22 верасьня, калі пачалася апэрацыя з мэтай вярнуць Алепа – другі па велічыні горад у Сырыі – пад урадавы кантроль.
