У той жа час у Крамлі заявілі, што Пуцін будзе гатовы наведаць Парыж, «у той час, калі гэта будзе зручна для прэзыдэнта Алянда». Пра гэта паведамляе Міжнароднае францускае радыё.
«Дыялёг з Расеяй патрэбны, але ён павінен быць жорсткім і шчырым», — дадаў прэзыдэнт Францыі, падкрэсьліўшы, што паміж Парыжам і Масквой «сурʼёзныя рознагалосьсі» ў пытаньні Сырыі.
Раней у аўторак Елісейскі палац паведаміў, што ў Крамлі заявілі пра жаданьне перанесьці візыт Уладзіміра Пуціна ў Парыж, першапачаткова намечаны на 19 кастрычніка.
У адміністрацыі прэзыдэнта Францыі паведамілі, што паміж Елісейскім палацам і Крамлём адбыліся перамовы, падчас якіх францускі бок прапанаваў правесьці ў Парыжы двухбаковую працоўную сустрэчу лідэраў краін па сырыйскім пытаньні пры ўмове, што Франсуа Алянд ня будзе ўдзельнічаць у іншых мерапрыемствах. У адказ у Крамлі заявілі, што жадаюць адкласьці візыт.