Лінкі ўнівэрсальнага доступу

Справа Шарамета: тры мабільныя апэратары абавязаныя да 12 кастрычніка перадаць сьледзтву раздрукоўкі размоваў журналіста


Пячэрскі раённы суд Кіева абавязаў трох мабільных апэратараў — «Кіеўстар», «МТС Украіна» і «Лайфстэл» перадаць да 12 кастрычніка сьледзтву ў справе пра забойства Паўла Шарамета ўсе дадзеныя пра тэлефонныя званкі, SMS i MMS паведамленьні, а таксама пра выкарыстаньне GPRS-трафіка.

Апроч таго, паводле рашэньня суду, сьледзтва мае атрымаць інфармацыю пра нумары ды ІМЕІ тэлефонаў, зь якіх тэлефанавалі журналісту з прывязкай да мясцовасьці.

У прыватнасьці, сьледчыя цікавяцца мабільнаю актыўнасьцю беларускага журналіста 15 студзеня, 15 лютага, 15 сакавіка, 15 траўня і 15 ліпеня 2016 года. З рашэньня суду незразумела, чаму сьледзтва вызначыла менавіта гэтыя дні.

Адначасова суд абавязаў службу бясьпекі гатэлю «Опэра», які знаходзіцца паблізу месца гібелі Паўла Шарамета, перадаць сьледзтву для вывучэньня відэа з камэр вонкавага назіраньня. Паводле сьледчых, «відэазапіс, які знаходзіцца ў валоданьні службы бясьпекі гатэля „Опэра“, мае важнае значэньне для дасудовага расьсьледаваньня, бо дадзеныя, атрыманыя ў ходзе прагляду відэазапісу, яго аналізу і вывучэньня, могуць спрыяць раскрыцьцю крымінальнага злачынства і ўсталяваньню вінаватых асоб».

У выпадку, калі мабільныя апэратары і гатэль «Опэра» не перададуць своечасова інфармацыю, што цікавіць сьледзтва, суд можа дазволіць правядзеньне ператрусу для канфіскацыі заяўленых рэчаў і дакумэнтаў.

Павал Шарамет загінуў 20 ліпеня ў Кіеве ў выніку выбуху аўтамабіля. Паводле папярэдніх вынікаў расьсьледаваньня, дзяўчына і хлопец заклалі самаробную выбуховую прыладу пад машыну напярэдадні ўначы. Паліцыя шукае адзінага сьведка, які ў той час праходзіў побач і мог бачыць абодвух падазраваных. Сьледзтва пакуль не ўстанавіла іх асобаў.

Паліцыя кваліфікавала злачынства паводле артыкулу пра наўмыснае забойства, зьдзейсьненае спосабам, небясьпечным для жыцьця многіх асоб.

У жніўні Пячэрскі раённы суд Кіева дазволіў сьледчым вывучыць зьмест банкаўскага сэйфа Паўла Шарамета ў Ашчадбанку і апэрацыі ягонага рахунку ў Альфа-банку. Паліцыя мяркуе, што ў банкаўскіх дакумэнтах можа знаходзіцца інфармацыя, важная для раскрыцьця злачынства і ўстанаўленьня матыву забойства.

У часе сьледзтва паліцыя ўстанавіла будынак, зь якога злачынцы маглі назіраць адначасова за прыпаркаванымі аўтамабілямі побач з домам, дзе жыў Павал Шарамет і за скрыжаваньнем, дзе аўтамабіль быў падарваны. На падставе санкцыі суду паліцыя мала правесьці агляд гэтага будынку для фіксацыі, выяўленьня і канфіскацыі рэчаў і дакумэнтаў, якія маюць важнае значэньне для дасудовага расьсьледаваньня справы.

Журналісты выкарыстоўваюць кожную публічную падзею з удзелам кіраўніцтва Генэральнай пракуратуры і Нацыянальнай паліцыі Ўкраіны, каб даведацца пра падрабязнасьці расьсьледаваньня. Але кожны раз навіны гучаць аднолькава — прагрэсу няма, вывучаем відэазапісы, сьледчыя працуюць.

16 верасьня прэзыдэнт Украіны Пятро Парашэнка патрабаваў ад праваахоўных органаў празрыстасьці ды эфэктыўнасьці ў расьсьледаваньні забойства беларускага журналіста Паўла Шарамета. «Вядома, праблема, калі выбухае машына журналіста пасярод вуліцы ў цэнтры Кіева — гэта тэрарыстычны акт і гэта можа адбыцца ў любой краіне, але ўкраінскі прэзыдэнт, украінскі ўрад, украінскія праваахоўныя органы павінны паказаць эфэктыўнасьць і празрыстасьць гэтага расьсьледаваньня. Гэта вельмі важны тэст для ўнутраных органаў Украіны, як пройдзе гэтае расьсьледаваньне», — сказаў Пятро Парашэнка ў часе выступу на сустрэчы Ялцінскай эўрапейскай стратэгіі YES.

19 верасьня стала вядома, што Генэральная пракуратура выклікала на допыт больш як 10 супрацоўнікаў украінскага Інтэрнэт-тэлебачаньня «17 канал», журналісты якога першымі апынуліся на месцы забойства Паўла Шарамета. Яны зьнялі і разьмясьцілі ў Інтэрнэце відэа, на якім Паўла выцягвалі з аўтамабіля адразу пасьля выбуху. 17 канал патлумачыў сваю апэратыўную прысутнасьць на месцы здарэньня выпадковасьцю: маўляў, журналісты вартавалі пад домам мэра Кіева Віталя Клічко, каб запісаць зь ім інтэрвію, але не ведалі, што мэра няма ў сталіцы. Віталь Клічко ў той час знаходзіўся за мяжой.

28 верасьня міністар унутраных спраў Украіны Арсен Авакаў заявіў, што падрабязнасьці расьсьледаваньня справы пра забойства Паўла Шарамета будуць абнародаваныя толькі пасьля атрыманьня вынікаў.

Паказаць камэнтары

XS
SM
MD
LG