Лінкі ўнівэрсальнага доступу

Прэзыдэнт клюбу «Ахмат» пра дзіцячыя баі: Хто такі Емяльяненка, каб нас крытыкаваць?


Прэзыдэнт байцоўскага клюбу «Ахмат» Абузайд Вісмурадаў адказаў кіраўніку Саюзу зьмешаных баявых мастацтваў (ММА) Расеі Фёдару Емяльяненку, які раскрытыкаваў правядзеньне баёў па зьмешаных адзінаборствах паміж дзецьмі ў Грозным.

«Пытаньне, хто ён такі, каб даваць ацэнку нашаму турніру і паядынкам?» — напісаў Вісмурадаў у сваім інстаграме.

«Можа яго грызе зайздрасьць, таму што Grand-Prix Akhmat 2016 Final многімі прызнаны найлепшым турнірам у гісторыі расейскага ММА, а яго сюды не запрасілі? Ці ён стаў змагаром за справядлівасьць?» — напісаў Вісмурадаў.

4 кастрычніка ў Грозным адбыўся турнір па зьмешаных адзінаборствах, у якім разам з дарослымі байцамі ўдзельнічалі дзеці кіраўніка Чачні Рамзана Кадырава: 10-гадовы Ахмад, 9-гадовы Зелімхан і 8-гадовы Адам. Усе яны выйгралі свае баі; Ахмад перамог накаўтам за 14 сэкунд.

Адзін з самых вядомых расейскіх байцоў ММА Фёдар Емяльяненка абурыўся тым, што баі былі заяўлены як паказальныя, аднак дзеці біліся па сапраўднаму, прытым без ахоўных шлемаў.

У сувязі з турнірам у Грозным прэс-сакратар прэзыдэнта Расеі Дзьмітрый Пяскоў заявіў, што «наглядныя органы» павінны зацікавіцца трансьляцыяй баёў паміж дзецьмі па тэлебачаньні. На думку Пяскова, «накаўтаваньне дзіцяці, ды яшчэ ў тэлеэфіры — гэта падстава для таго, каб адпаведныя наглядныя органы зацікавіліся гэтай падзеяй».

XS
SM
MD
LG