Па ўсёй Польшчы жанчыны ў панядзелак зьбіраюцца страйкаваць супраць новага закону аб абортах. Закон, які ўжо прыняты парлямэнтам у першым чытаньні, крыміналізуе аборты і забараняе іх нават у тым выпадку, калі цяжарнасьць наступіла ў выніку згвалтаваньня. Жанчыне, якая зрабіла аборт, а таксама таму лекару, які выканаў апэрацыю, пагражае да 5 гадоў турмы.
На знак пратэсту супраць закону полькі па ўсёй краіне адмаўляюцца выходзіць на працу, выконваць хатнія абавязкі і займацца сэксам. Многія кіраўнікі кампаній падтрымліваюць гэтую ініцыятыву і далі супрацоўніцам афіцыйны выходны.
У Кракаве акцыі пратэсту пройдуць раніцай на Польскім бульвары і ўвечары на галоўнай плошчы гораду. У Варшаве ўдзельніцы дэманстрацыі заблякавалі некалькі ўрадавых будынкаў і пешаходных пераходаў у цэнтры горадау. У Катавіцэ асноўныя пратэсты намечаны на 4 гадзіны дня мясцовага часу.
Мэр гораду Слупску Робэрт Бедрань абвясьціў, што на знак салідарнасьці з пратэстуючымі жанчынамі ўся мэрыя ў панядзелак ня будзе працаваць.
Польскія законы аб перапыненьні цяжарнасьці — адны з самых жорсткіх у Эўропе: сёньня аборты ў краіне дазволеныя толькі ў выпадку, калі жыцьцё зародка або маці знаходзіцца ў небясьпецы, і калі цяжарнасьць наступіла ў выніку згвалтаваньня або інцэсту. Аднак новыя законы пагражаюць крымінальным перасьледам таксама жанчынам, у якіх адбыўся спарон: ім прыйдзецца даказваць, што перапыненьне цяжарнасьці не было наўмысным.
Закон быў унесены ў парлямэнт юрыдычнай групай Ordo Iuris і праляйфэрскім рухам Stop Abortion пасьля таго, як адпаведная ініцыятыва сабрала больш за 100 тыс. подпісаў. Пасьля гэтага яго падтрымалі каталіцкая царква і кіруючая партыя Закон і Справядлівасьць (PiS), і 23 верасьня ён быў прыняты ў першым чытаньні.
Аналягічныя жаночыя пратэсты супраць крыміналізацыі абортаў у кастрычніку 1975 году праходзілі ў Ісьляндыі: тады 90% жыхарак краіны адмаўляліся выходзіць на працу, рыхтаваць ежу, глядзець за дзецьмі і выконваць іншыя хатнія абавязкі.
Паводле дадзеных апытаньня Ipsos, праведзенага для Newsweek Polska, 50% палякаў падтрымліваюць жаночы страйк, а 15% апытаных заявілі, што прымуць у ім удзел.