Лінкі ўнівэрсальнага доступу

На вокладцы часопісу Playboy упершыню зьявіцца дзяўчына ў хіджабе


Нур Тагуры

Нур Тагуры

22-гадовая амэрыканская журналістка лібійскага паходжаньня Нур Тагуры зьнялася для вокладкі часопісу Playboy не ў аголеным выглядзе, а ў кедах, штанах і скураной куртцы. Яна заклікае жанчын да сьціпласьці.

Тагуры жыве і працуе ў амэрыканскім шатаце Заходняя Вірджынія — на радыё CBS, тэлеканале CTV News і ў навінным праекце Newsy. Прычым яна стала першай журналісткай на нацыянальных амэрыканскіх тэлеканалах, якая зьявілася на экране ў хіджабе.

Кастрычніцкі нумар Playboy рэдакцыя зьбіраецца прысьвяціць людзям, якія парушаюць агульнапрынятыя правілы і дамагаюцца свайго, нягледзячы на скандалы і грамадзкае асуджэньне. Тагуры зьнялася на вокладцы цалкам апранутай, у традыцыйнай для сябе скураной куртцы і белых кедах. Яна, па яе словах, зьбіраецца расказаць у інтэрвію пра тое, як важна весьці сябе сьціпла.

Сярод іншых асобаў, якія зьявяцца ў нумары — актрыса Аляксандра Вонг, пісьменьнік Пол Біці і танцорка Стоя, якая працавала ў порнабізнэсе.

Тагуры, выпускніца ўнівэрсытэта Мэрылэнду, лічыцца адным зь вялікіх маладых талентаў у «новай» амэрыканскай журналістыцы. Таксама яна вядомая як аўтар матывацыйных ролікаў і зорка Інстаграму. Яна прачытала некалькі лекцый на адукацыйным партале TED, заклікаючы людзей не хаваць і не саромецца сваёй расавай, рэлігійнай ды іншай ідэнтычнасьці і заўсёды імкнуцца выканаць сваю мару. У яе такі марай было зьявіцца на тэлеэкране ў хіджабе, і ёй гэта ўпершыню ўдалося зрабіць у 2012 годзе, калі яна правяла перадачу навінаў на тэлеканале ABC. Тагуры кажа, што ня ўсім яе прыхільнікам і знаёмым спадабалася яе рашэньне зьняцца для «Плэйбоя», і многія былі шакаваныя, убачыўшы на вокладцы эратычнага часопіса жанчыну-мусульманку. Але яна, па яе словах, імкнецца не зьвяртаць увагі на такую рэакцыю.

XS
SM
MD
LG