Ён лічыць парушэньнем Міжнароднага пакту пра грамадзянскія і палітычныя свабоды штраф у 630 беларускіх рублёў, прызначаны яму за арганізацыю і ўдзел у «Беларускім нацыянальным кангрэсе» 15 траўня ў менскім парку Янкі Купалы.
Суд Цэнтральнага раёну Менску аштрафаваў Фядыніча 3 чэрвеня па ч. 2 арт.23.34 адміністрацыйнага кодэксу за парушэньне парадку арганізацыі і правядзеньня масавага мерапрыемства. Таксама за акцыю аштрафавалі Міколу Статкевіча, Уладзімера Някляева, Вячаслава Сіўчыка, Станіслава Шушкевіча і іншых удзельнікаў.
Як праходзіў Кангрэс пад адкрытым небам. ФОТАГАЛЕРЭЯ:
Як праходзіў Кангрэс пад адкрытым небам. ФОТАГАЛЕРЭЯ
Фядыніч зьвяртаў увагу на блытаніну ў паказаньнях супрацоўнікаў АМАП на судзе супраць яго. Тыя пераблыталі месца правядзеньня акцыі (назвалі Янку Купалу Якубам Коласам) і заявілі, што ўдзельнікаў акцыі папярэджвалі пра яе незаконнасьць (актывісты і журналісты такога ня бачылі).
Старшыня РЭП заяўляе, што Кангрэс зьбіраліся правесьці ў памяшканьні, адаслалі запыт у Менгарвыканкам. Улады адказалі, што патрабаваньням пад Кангрэс адпавядаюць тры дзясяткі памяшканьняў, куды трэба зьвяртацца самастойна. Але ініцыятары Кангрэсу зьвярнуліся ў 12 з прапанаваных месцаў — і паўсюль ім адказалі, што для правядзеньня там кангрэсу неабходная санкцыя Менгарвыканкаму. У выніку акцыю вырашылі правесьці ў парку Купалы.
Фядыніч лічыць, што прыцягненьне яго да адказнасьці за мірны сход не было неабходным у межах абароны нацыянальнай бясьпекі ці падтрымкі грамадзкага парадку, таму суд парушыў артыкулы 19 і 21 Міжнароднага пакту пра грамадзянскія і палітычныя правы, што прызнаюць права кожнага на вольны распаўсюд інфармацыі і мірныя сходы. Таксама ён просіць Камітэт рэкамэндаваць Беларусі прывесьці ў адпаведнасьць зь міжнароднымі нормамі закон «Аб масавых мерапрыемствах».
