Бакі абмяркоўвалі магчымасьць падпісаньня пагадненьня аб разьвядзеньні сілаў на лініі сутыкненьня на Данбасе. Гэта тое, што тыдзень таму анансавалі міністры замежных спраў ФРГ і Францыі падчас візыту ў Кіеў. Вядома, што падгрупа ўчора парафавала пагадненьне, сёньня на пасяджэньні Трохбаковай кантактнай групы яго павінны падпісаць.
Гэтая дамова не зьяўляецца нейкім нечаканым прарывам, пагадненьне прадугледжвае стварэньне трох зонаў бясьпекі: у Залатым, Пятроўскім і Станіцы Луганскай, пра што ўжо вяліся перамовы на працягу апошніх трох месяцаў, прычым спачатку ішла размова пра 12 такіх зонаў на лініі сутыкненьня, адкуль на 2 кілямэтры з кожнага боку маюць адвесьці зброю і войскі, а маніторынгавая місія АБСЭ будзе кантраляваць гэты працэс.
Другая важная падзея, якая чакаецца сёньня ў Менску падчас пасяджэньня Трохбаковай кантактнай групы, — сустрэча міністраў энэргетыкі Расеі і Ўкраіны для абмеркаваньня праблемаў аднаўленьня электразабесьпячэньня на Данбасе.
Акрамя гэтага, прадстаўніца Ўкраіны ў гуманітарнай падгрупе Ірына Герашчанка плянуе зноў узьняць пытаньне абмену палоннымі, якое было размарожанае пасьля таго, як у мінулую суботу вызвалілі ўкраінцаў Уладзіміра Жамчугова і Юрыя Супруна ў абмен на 4 баевікоў.
Трохбаковая кантактная група таксама разглядае дарожную мапу па ўрэгуляваньні канфлікту на Данбасе і прапановы зьмяненьняў у стратэгіі і фармаце перамоваў ад амбасадара Марціна Сайдзіка і іншых заходніх дыпляматаў, а таксама прапанову Ўкраіны аб стварэньні новай падгрупы — па вяртаньні кантролю Кіева над захопленым Расеяй участку дзяржаўнай мяжы на Данбасе.