Добры вечар! Беларуская армія нарэшце пачала вучыцца, на палігоне пад Лепелем, як зачышчаць тэрыторыю ад сэпаратыстаў. Даўно было трэба.
АКАЗАЛАСЯ, «РОССИЮ 24» НЕЛЬГА ТРАНСЬЛЯВАЦЬ. Пры нагодзе змаганьня журналіста Глеба Лабадзенкі з аўтазапраўкай кампаніі United Company высьветлілася, што ня толькі запраўкі гэтай кампаніі, а і ўсе іншыя ў Беларусі ня маюць права трансьляваць тэлеканал «Россия 24». Што больш, «Россия 24» не ўваходзіць у лік 209 замежных каналаў, на распаўсюд якіх можна атрымаць дазвол у Беларусі.
НОВЫ ЭЎРАПЕЙСКІ ДЫСКУРС. Амбасадарка Францыі ў Беларусі Дамінік Газюі сказала, што сёньня супрацоўніцтва паміж Беларусьсю і ЭЗ «ужо разьвіваецца значна больш дынамічна, чым некалькі гадоў таму». Спадарыня Газюі дадала, што «Эўразьвяз гатовы аказваць экспэртную, тэхнічную і, па магчымасьці, фінансавую дапамогу вашай краіне».
ПАЭТКА І РАМАН. «Быў у яе раман. Але бацька не дазволіў. Таму што патрэбны чалавек дужы, моцны духам. Каб усё жыцьцё даглядаць. Бацька сказаў «не». Была драма. Малады чалавек быў украінец. Ён прасіў рукі. Тады, я памятаю, было — ой, страшна глядзець было на ўсё гэта. Праплакала яна, бедненькая, але бацьку паслухалася» – гэткі ўспамін пра паэтку Ніну Мацяш запісаў наш няўрымсьлівы падарожнік Зьміцер Бартосік ад сястры паэткі, Алены, калі наведаўся ў родавы дом Мацяшоў у вёсцы Нівы на Палесьсі.
СУВОРАВА Ў КОБРЫНІ НЕ ПАМЕНЕЕ. Помнік расейскаму генэралісімусу Аляксандру Сувораву ў Кобрыні, які 17 верасьня выпадкова зьнёс кіроўца мясакамбінату, адрамантуюць і вернуць на ранейшае месца. Alas, poor Suvorick! – мог бы ўсклікнуць Гамлет над разьбітым пастамэнтам. Аднак ня ўсклікне. У Кобрыні ёсьць два іншыя помнікі Сувораву, а яшчэ вуліца імя Суворава, аднайменны парк, дом-музэй Суворава і гатэль «Сувораў». Alas, poor Kobrуn!
«КРОЎ ЛІСТАПАДА» МОЖНА ПРАЛІЦЬ УЖО Ў КАСТРЫЧНІКУ. Распрацоўшчыкі беларускамоўнай відэагульні «Айзэнвальд: Кроў лістапада» абяцаюць, што яе лічбавыя копіі пачнуць распаўсюджвацца ўжо ў кастрычніку 2016 году. Матывацыя для заканчэньня працы моцная: праз інтэрнэт яны сабралі ад аматараў відэагульняў па-беларуску больш за 12 тысяч даляраў.
Падпісацца праз электронную пошту.
