Лінкі ўнівэрсальнага доступу

Польскія сьледчыя: у справе аб крушэньні Ту-154 ёсьць новыя доказы


Партрэт прэзыдэнта Леха Качыньскага, які загінуў у авіякатастрофе пад Смаленскам у 2010 годзе

Партрэт прэзыдэнта Леха Качыньскага, які загінуў у авіякатастрофе пад Смаленскам у 2010 годзе

Польская камісія, якая расьсьледуе катастрофу прэзыдэнцкага самалёта Ту-154 пад Смаленскам у 2010 годзе, атрымала запісы перамоваў расейскіх дыспэтчараў. На думку сьледчых, дыспэтчары ўвялі экіпаж лайнэра ў зман. Пра гэта паведаміў у нядзелю кіраўнік камісіі Вацлаў Берчыньскі.

Па словах Берчыньскага, у распараджэньні камісіі аказаліся аўдыёзапісы перамоваў у вежы кантролю палётаў у аэрапорце Смаленску. Зь іх вынікае, што дыспэтчары далі пілётам няслушную інфармацыю пра адлегласьць да пачатку узьлётна-пасадачнай паласы. Сьледчыя лічаць, што гэта магло стаць прычынай крушэньня лайнэра. 15 верасьня камісія правядзе прэс-канфэрэнцыю, дзе прадставіць падрабязнасьці расьсьледаваньня.

10 красавіка 2010 году ў выніку катастрофы польскага самалёта Ту-154 пад Смаленскам загінулі 96 чалавек, у тым ліку прэзыдэнт Польшчы Лех Качыньскі. Расьсьледаваньне трагедыі працягваецца да гэтага часу. Польская сьледчая камісія назвала крушэньне лайнэра тэрактам. Паводле вэрсіі расейскага боку, прычынай крушэньня стала памылка пілёта.

XS
SM
MD
LG