Лінкі ўнівэрсальнага доступу

«Быць дэпутатам» — 4 гады адпачываць у Менску + 1500 даляраў на месяц


Трапіць у парлямэнт — гэта як атрымаць адпачынак на чатыры гады ў сталіцы. Так думаюць пра працу дэпутатаў Палаты прадстаўнікоў у рэгіёнах. Свабода падлічыла, што маюць беларускія дэпутаты.

Аклад міністра і грошы на бэнзін

Заробак у 2400–3000 новых рублёў. Пры сярэднім заробку па краіне 670 рублёў за 2015 год

Трапіць у парлямэнт — значыць забясьпечыць сям’ю прынамсі на чатыры гады. Парлямэнтарыі не агучваюць сваіх заробкаў, але іх можна вылічыць. Тыя дэпутаты, што балятуюцца другім разам, публікуюць дэклярацыі аб даходах. Зь іх выходзіць, што ў сярэднім дэпутат мае 2,4–3 тысячы рублёў.

Дом Ураду многія дэпутаты бачаць як месца адпачынку

Дом Ураду многія дэпутаты бачаць як месца адпачынку

Прыкладна такі самы быў заробак у дэпутатаў другога скліканьня (2000–2004 гады). Па словах Сяргея Скрабца, які быў у тым парлямэнце, ягоны заробак быў у эквіваленце адной тысячы даляраў — каля 2 тысяч рублёў.

«Заробкі раз на месяц нам прывозілі з Кіраўніцтва спраў прэзыдэнта, — кажа Скрабец. — Яно цалкам забясьпечвала выдаткі на Палату прадстаўнікоў».

Па заканчэньні свайго тэрміну дэпутаты атрымліваюць выходную дапамогу, як у міністра. Скрабец кажа, што ў 2004 годзе дэпутатам выплачвалі трайны аклад.

Стаж. Уся дэпутацкая праца залічваецца адначасова і ў стаж дзяржаўнай службы, і ў стаж працы па спэцыяльнасьці.

Камфортныя ўмовы для працы. Кожны дэпутат мае ўласны кабінэт у Доме ўраду.

Бясплатны праезд і службовы аўтамабіль пры патрэбе. На ўсе віды грамадзкага транспарту, у тым ліку паветранага, у межах Беларусі. Па законе ім кампэнсуюць грошы на паліва (калі паездка была працоўная) ці даюць службовы аўтамабіль. На пачатку 2000-х дэпутаты мелі па адной «Волзе» на камісію.

Службовая кватэра на час дэпутацтва. Кватэру дэпутатам не даюць ва ўласнасьць, як і права на льготныя крэдыты. Толькі іншагароднім даюць службовыя кватэры на час працы.

Дэпутацкая недатыкальнасьць. Паводле закону дэпутаты Палаты прадстаўнікоў карыстаюцца недатыкальнасьцю пры выказваньні сваіх меркаваньняў і ажыцьцяўленьні сваіх паўнамоцтваў. Недатыкальнасьць дэпутата Палаты прадстаўнікоў распаўсюджваецца таксама на іх жылое, службовае памяшканьні, асабісты і службовы транспартныя сродкі, ліставаньне, сродкі сувязі і дакумэнты, якія ім належаць.

Паказаць камэнтары

XS
SM
MD
LG