Як паведаміў прэс-сакратар расейскага прэзыдэнта Дзьмітры Пяскоў, абмяркоўваліся сытуацыя ў Сырыі і ва Ўкраіне. Паводле яго, сустрэча працягвалася даўжэй, чым плянавалася, прайшла «добра» і супольная работа будзе працягнутая.
У перамовах таксама ўдзельнічалі дзяржсакратар ЗША Джон Керы, кіраўнік расейскага міністэрства замежных справаў Сяргей Лаўроў і памочнік прэзыдэнта Юры Ўшакоў.
Раней у панядзелак Керы і Лаўроў ня здолелі ўзгадніць каардынацыю дзеяньняў ЗША і Расеі ў Сырыі з-за сур’ёзных разыходжаньняў.
Грамадзянская вайна ў Сырыі доўжыцца з 2011 году. Злучаныя Штаты і Расея спрабуюць дамовіцца аб супольным урэгуляваньні канфлікту і барацьбе з ісламістамі ў рэгіёне. ЗША неаднаразова абвінавачвалі Расію ў авіяўдарах па сілах памяркоўнай апазыцыі, якіх Вашынгтон падтрымлівае.
Гэта першая асабістая сустрэча прэзыдэнтаў ЗША і Расеі сёлета. Папярэдняя іх сустрэча адбылася ў лістападзе 2015 году.