«Улічваючы рэальнасьць пагроз у дачыненьні да аб’ектаў крытычнай інфраструктуры, рэжымных аб’ектаў, зоны антытэрарыстычнай апэрацыі, грамадзкіх месцаў з прычыны бескантрольнасьці выкарыстаньня гэтага сэрвісу на тэрыторыі Ўкраіны і бясьпекі шараговых грамадзян, Міністэрства ўнутраных спраў гатова ініцыяваць разгляд на пасяджэньні Кабінэту міністраў Украіны і Рады нацыянальнай бясьпекі і абароны пытаньні рэгуляваньня дзейнасьці на тэрыторыі Ўкраіны падобных сэрвісаў», — паведамілі Радыё Свабода ў Дэпартамэнце камунікацыі МУС Украіны.
Міністэрства ўнутраных спраў сьцьвярджае, што ініцыятыва будзе абапірацца на замежны досьвед рэагаваньня дзяржаўных органаў, у прыватнасьці, на досьвед Ізраілю.
Ужо цяпер праваахоўныя органы Ўкраіны распаўсюдзілі рэкамэндацыі для грамадзян. У іх грамадзян заклікаюць не заходзіць на тэрыторыю прыватнай уласнасьці і рэжымных аб’ектаў.
Ва Ўкраіне пакуль не абвешчаная дата афіцыйнага запуску гульні. Цяпер украінцы запампоўваюць праграму нелегальна: рэгіструюцца на амэрыканскім акаўнце, зьмяняючы лякацыю «Ўкраіна» на ЗША ці Аўстралію.
Адзін з украінскіх мабільных апэратараў у чаканьні афіцыйнага запуску гульні ўжо распрацаваў і запрапанаваў кліентам новы тарыфны плян па выкарыстаньні мабільнага Інтэрнэту, каб паляваць на пакемонаў можна было без абмежаваньняў.