Прэзыдэнт Казахстану Нурсултан Назарбаеў сказаў, што прэзыдэнт Украіны Пятро Парашэнка схіляецца да пошуку кампрамісу для спыненьня канфлікту на ўсходзе Ўкраіны. Назарбаеў сустрэўся 16 жніўня ў Сочы з прэзыдэнтам Расеі Уладзімірам Пуціным і паведаміў яму пра «нядаўнюю» тэлефонную размову з прэзыдэнтам Украіны.
Парашэнка, паводле Назарбаева, сказаў, што ўкраінскі парлямэнт перашкаджае прыняцьцю заканадаўства аб статусе ўсходніх раёнаў Украіны, якія знаходзяцца пад кантролем прарасейскіх сэпаратыстаў.
Пуцін падзякаваў Назарбаеву за яго ролю пасярэдніка ў паляпшэньні стасункаў Расеі з Турцыяй. Разам з тым прэзыдэнт Расеі выказаў надзею на тое, што расейска-казахстанскі гандлёвы абарот, які зьмяншаецца апошнім часам, будзе расьці.
Назарбаеў паведаміў журналістам, што да канца году плянуе сустрэцца з Пуціным як найменей пяць разоў. Цяперашняя паездка 76-гадовага прэзыдэнта Казахстану Назарбаева ў Сочы стала яго дзевятнаццатым візытам у Расею з 2012 году.
