Афіша
У Менску ў Лошыцкім парку пройдзе фэстываль «А-fest», на якім можна будзе адпачываць пад адкрытым небам, атрымліваць асалоду ад музыкі, смачнай і разнастайнай ежы і ўдзельнічаць у вулічных гульнях. Хэдлайнэрам музычнай праграмы будзе эўрапейская група Brainstorm. Дапоўняць музычную праграму фэстывалю групы J:MORS і Navi.
У вёсцы Высокае (Бярозаўскі раён, Брэсцкая вобласьць) пройдуць «Спораўскія сенажаці» — спаборніцтвы па ручной касьбе нізінных балотаў. Гэта адзіны такога кшталту чэмпіянат у Беларусі, які стаў традыцыйным, і які пройдзе ў гэтым годзе ў 10-ы раз. Пачатак а 10.30.
У вёсцы Сула (Стаўбцоўскі раён, Менская вобласьць) пройдзе міжнародны фэстываль раньняга сярэднявечча «Шлях Вікінгаў». У рамках фэстывалю будзе рэканструявана гандлёвая кампанія атрада вікінгаў, пройдуць вайсковыя спаборніцтвы і паядынкі. На пляцоўцы будзе дзейнічаць паходны лягер, дзе госьці сьвята змогуць ацаніць прадметы ўжытку, зброю, касьцюмы і паходны побыт вікінгаў.
У гісторыі
1654 — пасьля працяглае аблогі горад Гомель быў захоплены казакамі Івана Залатарэнкі. Залатарэнка прывёў у Беларусь сваё 20-тысячнае войска пры падтрымцы маскоўскага цара.
1899 — нарадзіўся клясык амэрыканскіх фільмаў жаху Альфрэд Хічкок.
1913 — нарадзіўся беларускі кампазытар Анатоль Багатыроў, адзін з заснавальнікаў беларускай опэры. Сярод іншага, ён напісаў музыку да опэры «У пушчах Палесься», абапёртай на аповесьці «Дрыгва» Якуба Коласа (пастаноўка ў 1939).
1920 — у польска-савецкай вайне пачалася гэтак званая Варшаўская бітва, у якой польскія сілы пад камандаваньнем Юзэфа Пілсудзкага затрымалі бальшавікоў каля Варшавы, а потым разьбілі іх і прымусілі да адступленьня. Шэраг польскіх перамогаў, якія адбыліся пасьля Варшаўскай бітвы, прывялі да мірнай польска-савецкай дамовы 1921 году ў Рызе. У выніку гэтай дамовы Заходняя Беларусь апынулася ў межах Польшчы.
1926 — нарадзіўся камуністычны дыктатар Кубы Фідэль Кастра. Ён кіраваў краінай з 1959 па 2006 год, калі перастаў зьяўляцца на публіцы і перадаў свае прэзыдэнцкія паўнамоцтвы малодшаму брату Раулю.
У памяці
1946 — памёр Гербэрт Уэлс, ангельскі пісьменьнік.
1956 — памёр народны паэт Беларусі Якуб Колас.
Цытата
Гарачы дзень. На полі душна.
Прыціх той ветрык непаслушны,
Як бы сваім аддаўся марам.
Зацішак поля дыша варам
І гоніць з твару поту рагі,
І сохнуць губы ад той смагі.
А жнейкі жнуць. У моры збожжа
Мільгае постаць іх прыгожа,
Калі ў паверхні таго жыта
Ўсплыве галоўка самавіта
І так прыгожа азірнецца,
А гібкі станік разагнецца;
Або калі над галавою
У жнейкі спрытнаю рукою
Пучок калосьсяў мільгатнецца,
Апіша дужку, бы вясёлку,
Бы нейкай зьнічкі сьлед пагаслы,
І борзда ляжа ў перавяслы,
Што распасьцёрты на падолку, —
Дапраўды: ўзмахаў гэтых мгненьне —
Адна любота, заглядзеньне!
Якуб Колас, «Новая зямля», з разьдзелу «Летнім часам»