Кандыдат у прэзыдэнты ЗША ад Рэспубліканскай партыі Дональд Трамп абвінаваціў лідэра ЗША Барака Абаму ў фармаваньні так званай «Ісламскай дзяржавы», паведамляе The New York Times.
«Яны паважаюць Абаму. Ён заснавальнік «Ісламскай дзяржавы», — заявіў Трамп у Флёрыдзе.
Ён паўтарыў гэтую заяву тройчы, паведамляе АР.
Сузаснавальніцай тэрарыстычнай арганізацыі кандыдат у прэзыдэнты ЗША ад рэспубліканцаў назваў сваю суперніцу Гілары Клінтан.
«Я б сказаў, што сузаснавальніцай была Гілары Клінтан», — дадаў Трамп.
Спадар Трамп і раней абвінавачваў Абаму і яго былога дзяржсакратара Гілары Клінтан у тым, што яны праводзілі такую палітыку на Блізкім Усходзе, якая прывяла да вакуўму ўлады ў Іраку, чым і скарысталася «Ісламская дзяржава».