У маскоўскім парку «Сакольнікі» 9 жніўня адбыўся мітынг супраць пакета «антытэрарыстычных» законаў, прапанаваных дэпутаткай Дзярждумы Расеі Ірынай Яравой. Прамую трансьляцыю з мітынгу вяла карэспандэнтка Радыё Свабода.
На мітынгу прысутнічала прыкладна паўтары тысячы чалавек.
Пакет «антытэрарыстычных» законаў быў падпісаны прэзыдэнтам Расеі Ўладзімірам Пуціным 7 ліпеня. Ён прадугледжвае ўвядзеньне крымінальнага пакараньня за «неданясеньне» і «схіленьне» да ўдзелу ў масавых беспарадках. Акрамя таго, апэратары сувязі абавязаныя запісваць і захоўваць усе тэлефонныя размовы і паведамленьні сваіх кліентаў.
Арганізатары і ўдзельнікі акцыі заявілі, што прымяненьне гэтых законаў пагражае зьнішчэньнем інтэрнэт-галіны ў Расеі.
Мітынгі, пікеты і народныя сходы супраць «пакета законаў Яравой» раней прайшлі ў Пецярбургу, Навасібірску, Екацярынбургу, Казані, Уфе ды іншых расейскіх гарадах.
