Лінкі ўнівэрсальнага доступу

Вязьня Кондруся наведалі бацькі: «Сын — напалову труп»


Меркавана, Уладзімер Кондрусь біе шкло Дома ўраду падчас акцыі пратэсту на плошчы Незалежнасьці пасьля прэзыдэнцкіх выбараў 2010 года
Меркавана, Уладзімер Кондрусь біе шкло Дома ўраду падчас акцыі пратэсту на плошчы Незалежнасьці пасьля прэзыдэнцкіх выбараў 2010 года

Уладзімера Кондруся, новага фігуранта крымінальнай справы аб масавых беспарадках падчас прэзыдэнцкіх выбараў у сьнежні 2010 году, упершыню за два месяцы наведалі бацькі.

Як распавёў праваабарончаму цэнтру «Вясна» ягоны бацька Ўладзімер Расьціслававіч, 9 жніўня ім нарэшце дазволілі сустрэцца ў СІЗА-1 Менску. Стан здароўя свайго 39-гадовага сына, які знаходзіцца ў санітарнай частцы «Валадаркі», бацькі ацэньваюць як «крытычны» — той вытрымаў толькі некалькі хвілін першага дазволенага спатканьня:

«Сын — напалову труп, у пакой для перамоваў вынесьлі на насілках. Яго хапіла на пяць хвілін гутаркі. Ён абсалютна зьнясілены. Гаварыў вельмі невыразна. Здаецца, што ён як у тумане, дрэнна разумее, вочы паўпустыя», — сказаў бацька вязьня.

У СІЗА Ўладзімер Кондрусь трымаў працяглую галадоўку на знак пратэсту супраць свайго зьняволеньня, што і стала прычынай рэзкага пагаршэньня стану здароўя. Паводле бацькі, нягледзячы на ранейшую пазыцыю, сёньня сын папрасіў дапамогі:

«Папрасіў нас дамагчыся, каб яму зрабілі зонд. У яго язва, і з гэтай прычыны нават не ўзялі ў войска. Цяпер ён харкае крывёю. Відавочна, язва абвастрылася. А ў санчастцы ніякай дапамогі не аказваюць. Ён просіць абязбольвальнае — не даюць. Маці сьлёзна прасіла перавесьці яго ў нармальны шпіталь... Нашаму сыну неабходная тэрміновая дапамога», — кажа Ўладзімер Расьціслававіч.

Жыхар пасёлку Рудзенск Уладзімер Кондрусь быў узяты пад варту 14 чэрвеня ў межах папярэдняга расьсьледаваньня за яго меркаваны ўдзел у масавых беспарадках каля Дому ўраду падчас выбараў прэзыдэнта ў 2010 годзе. Ён абвінавачваецца паводле артыкула 293 Крымінальнага кодэксу — «Масавыя беспарадкі». На час сьледзтва ён утрымліваецца ў СІЗА № 1 Менску.

У 2011 годзе ў сувязі з тымі падзеямі было асуджана блізу паўсотні чалавек, многія з пазбаўленьнем волі на розныя тэрміны.

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG