Лінкі ўнівэрсальнага доступу

Айплатаў шые вопратку для Кадырава


Рамзан Кадыраў

Рамзан Кадыраў

Вядомы беларускі дызайнэр Іван Айплатаў стварыў спартыўную форму для прэзыдэнта Чачні Рамзана Кадырава, ягоных сваякоў, а таксама для байцоў клюбу кікбоксінгу «Ахмат».

Пра гэта паведамляе TUT.by.

Неўзабаве форму дашыюць, і праз тры дні яна трапіць да заказчыка. Якой будзе форма Кадырава, Іван Айплатаў пакуль ня кажа.

Дызайнэр распавёў, што ў асяродзьдзі Кадырава ён мае асабістыя кантакты, таму форму замовілі яму.

«Там вельмі правільна выбудаваны адміністрацыйны ланцужок, і калі яны прымаюць рашэньне абраць прафэсіянала ў нейкай галіне, спачатку яго правяраюць, а потым давяраюць цалкам. Былі выказаныя пажаданьні: мы абгаварылі колер, набор сымбаляў і знакаў. Потым я зрабіў дызайн-праект, які зацьвердзілі», — распавёў ён.

Паведамляецца, што з Кадыравым асабіста Айплатаў не сустракаўся, перамовы вяліся з кіраўніком клюбу «Ахмат» Забітам Самедавым.

38-гадовага Рамзана Кадырава абвінавачваюць у карупцыі, масавым парушэньні правоў чалавека, забойствах палітычных апанэнтаў, асабістым удзеле ў катаваньнях.

Падчас Першай чачэнскай вайны (1994–1996 г.) Рамзан Кадыраў ваяваў за сэпаратыстаў, а падчас Другой чачэнскай вайны перайшоў на бок фэдэральнага ўраду — яму нават было прысвоена званьне Героя Расеі. Перш чым стаць прэзыдэнтам Чачні, Кадыраў быў кіраўніком службы бясьпекі прэзыдэнта Чачэнскай Рэспублікі і прэм’ер-міністрам Чачні.

У 2014 годзе Кадыраў падпаў пад санкцыі ЭЗ і ЗША ў сувязі з украінскімі падзеямі.

XS
SM
MD
LG