ПАДЗЕІ ДНЯ
Рыё-дэ-Жанэйра, Бразілія. Адкрыцьцё ХХХІ летніх Алімпійскіх гульняў.
У Менску (і іншых гарадах, па 7 жніўня) Рух «За Свабоду» праводзіць летнюю Школу «Выбарчыя сыстэмы і дэмакратыя». Удзельнікі знаёмяцца з мэханізмамі правядзеньня выбарчых кампаній, рознымі выбарчымі сыстэмамі і паліттэхналёгіямі.
У Менску пройдзе Беларуска-кітайскі форум у справе камэрцыялізацыі вынікаў навукова-тэхнічнай дзейнасьці. Месца правядзеньня — гатэль «Пэкін» (вул. Чырвонаармейская, 36)
Гурт Re1ikt выступіць разам з фіналістамі конкурсу «Засьпявай 3.0» Месца правядзеньня — Менск, падворак на пл. Волі. Пачатак а 19.00
Упершыню ў Нацыянальным мастацкім музэі адбудзецца арт-вечарынка, падчас якой любы ахвотны можа адчуць сябе ў ролі мастака. Пачатак а 19.00 Уваход па квітках.
У Горадні ў дзень адкрыцьця Гульняў у Рыё-дэ-Жанэйра для спартоўцаў-аматараў праводзіцца рэгіянальная міні-Алімпіяда. Месца правядзеньня — ЦСК «Нёман» (вул. Камунальная, 3)
У гісторыі:
1461 — нарадзіўся Аляксандар Ягайлавіч, вялікі князь літоўскі і кароль польскі.
1506 — адбылася бітва пад Клецкам, у якой Міхал Глінскі на чале войска ВКЛ ушчэнт разьбіў войска крымскага хана.
1772 — адбыўся першы падзел Рэчы Паспалітай. Тую фэдэратыўную краіну, у якую ўваходзілі галоўным чынам беларускія і польскія землі, падзялілі паміж сабой тры імпэрыі — Аўстрыя, Прусія і Расея.
1947 — нарадзіўся Віталь Скалабан, беларускі гісторык.
У памяці:
1863 — у двары Менскае турмы быў расстраляны Янка Жмачынскі. Гэта да ягоных ног кінула кветкі праз закратаванае вакно камэры Каміла Дунін-Марцінкевіч, арыштаваная за ўдзел у паўстаньні дачка знакамітага беларускага драматурга.
1864 — у Варшаве, у цытадэлі, быў павешаны камандзір Кобрынскага паўстанцкага атраду, адзін з кіраўнікоў паўстаньня Рамуальд Траўгут. Сёньня ў мястэчку Сьвіслач на Гарадзеншчыне, дзе ён вучыўся ў гімназіі, яму пастаўлены помнік.
1895 — памёр Фрыдрых Энгельс, нямецкі філёзаф і эканаміст.
1908 — памёр Валеры Ўрублеўскі, дзяяч міжнароднага рэвалюцыйнага руху, удзельнік паўстаньня 1863-1864 гг. і Парыскай камуны 1871 г.
1962 — памерла Мэрылін Манро, амэрыканская кіназорка.
Цытата:
«Ня будзем занадта цешыць сябе нашымі перамогамі над прыродай. За кожную такую перамогу яна помсьціць нам».
Фрыдрых Энгельс
