Лінкі ўнівэрсальнага доступу

Руская праваслаўная царква запусьціць свой уласны мэсэнджэр, праца над ім ужо пачалася.

Пра гэта перадае ТАСС са спасылкай на прэсавую службу праваслаўнай сацсеткі «Еліцы», створанай па благаславеньне Патрыярха Маскоўскага і ўсяе Русі Кірыла.

Мэсэнджэр будзе «важным зьвяном адзінай камунікацыйнай плятформы Расейскай праваслаўнай царквы, якая ствараецца распрацоўшчыкамі „Еліцы“ для задавальненьня патрэбаў вернікаў у інтэрактыўных зносінах і бесперапыннай сувязі прыхаджан з Царквой», — адзначылі ў прэс-службе.

У новым мэсэнджэры, акрамя звыклых функцый, такіх як перадача тэкставых, аўдыё- і відэапаведамленьняў, будуць і адмысловыя. У прыватнасьці, пашыранымі магчымасьцямі будуць валодаць сьвятары. «Прадстаўнікі розных узроўняў царкоўнай герархіі змогуць апэратыўна даносіць важную інфармацыю да шырокай аўдыторыі», — разьлічваюць распрацоўшчыкі.

Нагодай для стварэньня мэсэнджэра сталі запыты карыстальнікаў сацсеткі «Еліцы», у якой зарэгістравана больш за 100 тысячаў карыстальнікаў, уключаючы каля тысячы сьвятароў. Як паведамляецца, афіцыйныя старонкі ў сетцы маюць 63 дыяцэзіі і 45 архіерэяў. Падмуркам мэсэнджэра будзе база з 18 тысачаў праваслаўных храмаў і іх суполак.

«Патэнцыйная аўдыторыяй сацыяльнай сеткі і мэсэнджэру, па нашых ацэнках, могуць стаць ад 7 да 10 мільёнаў чалавек», — цытуе ТАСС дырэктара па разьвіцьці сеткі «Еліцы» Івана Сусьліна.

XS
SM
MD
LG