«Цяпер ідуць першачарговыя сьледчыя дзеяньні. Мы атрымліваем паказаньні тых, хто пражывае ў гэтым раёне, апытваем сьведак, у тым ліку і сумна вядомага расейскага каналу, які першым прыяжджае на месца нечаканых забойстваў, апытваем таксама блізкіх Паўла», — паведаміў Юры Луцэнка сёньня ў эфіры аднаго з украінскіх тэлеканалаў.
Паводле яго, у панядзелак, 25 ліпеня, будуць заслуханыя першыя высновы супрацоўнікаў ФБР, якія далучаныя ў якасці спэцыялістаў у пытаньнях выбуха- і аўтатэхнічнай экспэртызы. «Яны нам дапамагаюць і ў аналізе атрыманых відэа», — дадаў генэральны пракурор.
Юры Луцэнка адзначыў, што на пачатку наступнага тыдня да працы ў складзе апэратыўнай групы будуць дадаткова далучаныя сьледчыя Міністэрства ўнутраных спраў і Генэральнай пракуратуры.
Сьледзтва таксама правярае інфармацыю пра сачэньне за Паўлам і ягонай грамадзянскай жонкай Аленай Прытулай з боку прадстаўніка Нацыянальнай паліцыі Ўкраіны.
Юры Луцэнка абурыўся публікацыяй у Інтэрнэце відэа зь месца стаянкі аўтамабіля напярэдадні злачынства. «Гэта забівае таямніцу сьледзтва і ўскладняе працу праваахоўных органаў. А тыя, хто знутры праваахоўных органаў такім чынам зарабляе сабе папулярнасьць на сяброўстве з журналістамі або нават грошы за сэнсацыйныя матэрыялы, — мы іх шукаем і яны будуць звольненыя з праваахоўных органаў», — пераконвае ён.
