Адна з супрацоўніц кандыдата ў прэзыдэнты ад Рэспубліканскай партыі Дональда Трампа — былая балерына Мэрэд Маківэр, якая раней брала ўдзел у напісаньні некалькіх яго кніг — заявіла пра гатоўнасьць сысьці ў адстаўку ў сувязі з рэакцыяй у СМІ, якую выклікала прамова Мэланіі Трамп. Паводле Маківэр, кандыдат у прэзыдэнты адхіліў яе прапанову, сказаўшы, што «людзі зьдзяйсьняюць памылкі ненаўмысна і што мы расьцем дзякуючы гэтаму вопыту».
Па словах Маківэр, калі яна працавала над тэкстам выступу Мэланіі Трамп, жонка кандыдата ў прэзыдэнты зачытала ёй па тэлефоне некаторыя ўрыўкі з прамовы Мішэль Абамы. Маківер нібыта рабіла нататкі падчас размовы, а затым ўключыла некаторыя фармулёўкі ў канчатковы варыянт прамовы. Маківэр таксама заявіла, што ня бачыла прамовы Мішэль Абамы на нацыянальным зьезьдзе Дэмакратычнай партыі 2008 году.
Каманду Трампа рэзка скрытыкавалі ў сувязі з плягіятам у прамове, зь якой Мэланія Трамп выступіла 18 ліпеня на нацыянальным зьезьдзе Рэспубліканскай партыі. Выступ быў прысьвечаны падтрымцы Дональда Трампа, жонкай якога Мэланія зьяўляецца 11 гадоў.
