«Я вам магу назваць тры прычыны, чаму Расея і расейскія спэцслужбы да гэтага маглі быць датычныя — да да гібелі Паўла Шарамета.
Першая: у іх ёсьць досьвед, іх лавілі за руку на палітычных забойствах, у тым ліку міжнародных. Самае гучнае — гэта забойства Зэлімхана Яндарбіева ў Катары, дзе яны проста папаліся. Потым выдрапалі гэтых забойцаў. Дарэчы, падклалі бомбу ў машыну. Па дыпляматычных каналах іх потым вывозілі адтуль.
Другая прычына ў тым, што ёсьць вялікая праца расейскіх спэцслужбаў ва Ўкраіне, дзе іх зноў жа лавілі за руку. Мы памятаем гісторыю з Іванам Рыбкіным, кандыдатам у прэзыдэнты, які ішоў супраць Пуціна ў 2004 годзе, яго вывезьлі ў Кіеў і нешта такое зь ім зрабілі, што ён спыніў сваю крытыку і зьняў кандыдатуру. Была гісторыя з выкраданьнем апазыцыянэра Леаніда Развазжаева ва Ўкраіне і таемным незаконным вывазам празь мяжу ў Расею ўжо ў 2012 годзе.
Калі цяпер нам нехта будзе расказваць, што расейскія спэцслужбы па той бок мяжы, гэта не наша тэрыторыя, — ня трэба баяць, яны там актыўна прысутнічаюць, праводзяць нават такія апэрацыі.
Трэцяя прычына важная: я бачу, што яны цяпер ужо афіцыйна ўзяліся за цэлы шэраг вядомых людзей нашых, якія зьехалі ва Ўкраіну і працуюць там, падтрымліваюць рэформы, з крытычнай пазыцыяй да Масквы выступаюць. Мы ведаем, што былі ператрусы дома ў Яўгена Кісялёва. Ужо канкрэтныя прыклады абсалютна афіцыйнага перасьледу спэцслужбамі публічных фігур, якія зьехалі, якія цяпер у Кіеве. Гэта ўжо ёсьць перад вачыма — гэта факт. Таму тыя, хто кажуць, што не, па вызначэньні расейскія спэцслужбы ня могуць быць датычныя, на жаль, ёсьць вельмі шмат прыкмет, якія паказваюць, што наогул-то могуць. І гэта дае сур’ёзныя падставы гэта ўсё расьсьледаваць», — заявіў расейскі палітык.
Між тым, Мілоў прызнае, што матыў забойства ўсё роўна застаецца абсалютна незразумелы і таму сьцьвярджаць, што за гэтым злачынствам стаіць Крэмль, нельга.
«Я нічога не магу сказаць пра прычыны. Калі па Нямцову я на Радыё Свабода шмат выказваўся на гэтую тэму, мне даволі шмат было ясна адразу, што там тырчаць вушы расейскіх спэцслужбаў і ёсьць матыў відавочны, то па Паўлу Шарамету я, шчыра сказаць, не вельмі сачыў за яго журналісцкай дзейнасьцю менавіта ў Украіне ў апошні час. Мне здаецца, там вымалёўваецца вялікі букет матываў і арганізатараў. Гэта можа быць і з Украіны сьлед, можа быць і з Расеі, а можа і з Беларусі. Мы ведаем, што ён быў асабістым ворагам Аляксандра Лукашэнкі. То бок, зараз вельмі цяжка нешта казаць », — адзначыў ён.
Цалкам матэрыял можна прачытаць на сайце расейскай службы Радыё Свабода
