Амаль 130 чыгуначных вагонаў з транзытным грузам з Украіны, якія накіроўваліся ў Казахстан і Кіргізстан, затрыманыя на памежных перадатачных станцыях Украіны і Беларусі.
Пра гэта паведаміла прэс-служба ўкраінскай кампаніі «Укрзалізниця».
Падставай стала тое, што з 1 ліпеня Расея ўвяла дадатковыя абмежавальныя меры адносна транзыту ўкраінскіх тавараў па сваёй тэрыторыі.
Сярод іншага Расея падоўжыла харчовае эмбарга супраць шэрагу ўкраінскіх тавараў, уключаючы харчаваньне і прамысловую прадукцыю, да 31 сьнежня 2017 году. Яна ўвяла абмежаваньні на транзыт тавараў у Казахстан і Кіргізстан, забараніла транзыт тавараў, якія падпадаюць пад эмбарга або якія прадугледжваюць спагнаньне мыта, паведамляе УНІАН.
«Укрзалізниця» прапаноўвае альтэрнатыўныя маршруты для перавозкі грузаў, у прыватнасьці — так званы «Шаўковы шлях», які праходзіць па тэрыторыі Ўкраіны, Грузіі і Азэрбайджану.
Урад Украіны заявіў пра намер увесьці адпаведныя меры ў адказ на дзеяньні РФ.
