Лінкі ўнівэрсальнага доступу

Павіншаваць зь днём народзінаў расейскага вязьня Алега Сянцова прыйшлі і беларусы Ўкраіны


Украінскія актывісты зладзілі ў Кіеве і Харкаве акцыю салідарнасьці з украінскім рэжысёрам, сцэнарыстам і пісьменьнікам Алегам Сянцовым, асуджаным расейскім судом да 20 гадоў зьняволеньня за нібыта тэрарыстычную дзейнасьць у Крыме. Пасьля прысуду яго этапавалі для адбыцьця пакараньня ў Якуцію, але з таго моманту да яго не дапускаюць украінскіх дыпляматаў.

Сёньня Алегу Сянцову споўнілася 40 гадоў. На Майдан Незалежнасьці ў Кіеве прыйшлі родныя, сябры і яшчэ больш незнаёмых зь ім людзей, каб павіншаваць яго зь днём народзінаў. Сваю падтрымку прыйшлі выказаць і паплечнікі Алега — Надзея Саўчанка і Генадзь Афанасьеў, якія нядаўна былі вызваленыя і вярнуліся з Расеі на бацькаўшчыну.

Генадзь Афанасьеў

Генадзь Афанасьеў


— Тое, што Алег сказаў на судзе, і як ён заклікаў расейскі народ змагацца супраць тыраніі, ведаючы, што яму пагражае 20 гадоў пазбаўленьня волі — для мяне гэта ўзор мужнасьці. Ён стаў для мяне прыкладам. Дзякуючы яму я адчуваю сябе вольным у сэрцы і душы. Я вельмі яму ўдзячны, і вельмі хачу, каб ён паверыў, што зараз за ягонымі плячыма сапраўды ня толькі ўся Ўкраіна, а і ўвесь сьвет. Я спадзяюся, што хутка Алег таксама будзе на волі, — сказаў Генадзь Афанасьеў.

Надзея Саўчанка

Надзея Саўчанка


Надзея Саўчанка перакананая, што ўсе ўкраінцы, якія цяпер знаходзяцца ў расейскіх турмах, абавязкова будуць вызваленыя. А пакуль, яна мяркуе, кожны ўкраінец мае пісаць ім лісты са словамі падтрымкі. «Данбас, Крым, Украіна — усе разам. Нашые хлопцы вернуцца і мы будзем разам на волі. Мы за гэта будзем змагацца», — заявіла яна.

Алег Аўчыньнікаў

Алег Аўчыньнікаў


Павіншаваць Алега Сянцова зь днём народзінаў пад бел-чырвона-белым сьцягам прыйшла і група беларусаў. «Любая акцыя падтрымкі кагосьці з палітычных вязьняў — гэта заўсёды важна, і чым большая падтрымка, як сярод звычайных грамадзян, гэтак і ў кіраўніцтве краіны, тым хутчэй можа пайсьці справа па іх вызваленьні», — сказаў беларус Алег Аўчыньнікаў.

Натальля Каплан

Натальля Каплан


Натальля Каплан, сястра Алега Сянцова, паведаміла, што яе брат ня скардзіцца ані на здароўе, ані на ўмовы ўтрыманьня. «Ён кажа, што заўсёды адчувае падтрымку, і для яго гэта вельмі важна. Бо, як вядома, ёсьць дзьве катэгорыі вязьняў — тыя, пра каго ня памятаюць, і тыя, каго памятаюць і падтрымліваюць. Я хачу павіншаваць свайго брата зь днём нараджэньня. Я спадзяюся, што гэта яго апошні дзень народзінаў за кратамі», — адзначыла яна.


Удзельнікі акцыі маглі наўпрост на Майдане незалежнасьці падпісаць пэтыцыю з патрабаваньнем вызваленьня Алега Сянцова, падпісаць яму паштоўку і прачытаць урывак зь яго твораў.

Чытаньне твораў Сянцова

Чытаньне твораў Сянцова


Напрыканцы акцыі ў паветра ўзьняліся паветраныя балёнікі з надпісам: «Волю Алегу Сянцову».

XS
SM
MD
LG