Лінкі ўнівэрсальнага доступу

logo-print

Спачатку ў вёсцы пасяліліся мастакі, цяпер тут ладзяць пленэры і сьпявае Шалкевіч


Праца Сяргея Грыневіча на пленэры «Артсалат»

Праца Сяргея Грыневіча на пленэры «Артсалат»

У вёсцы Салацьце Гарадзенскага раёну паблізу літоўскай мяжы адбыўся другі пленэр «Артсалат» гарадзенскіх і менскіх мастакоў. Працы з пленэру ўпрыгожваюць навакольле — абыякавых няма.

Сёлета ў «Артсалаце» ўзялі ўдзел пераважна скульптары і дызайнэры. Як і летась, мастакі з Горадні і Менску рабілі мастацкія рэчы са звычайных кабэльных бухтаў, якія набыў гарадзенскі каваль Юрась Мацко. Ён, дарэчы, адзін з арганізатараў пленэру.

Нягледзячы на неспрыяльнае надворʼе, пераважная большасьць працаў скончаныя

Нягледзячы на неспрыяльнае надворʼе, пераважная большасьць працаў скончаныя

Нягледзячы на ня вельмі спрыяльнае надворʼе, за тыдзень удалося шмат чаго зрабіць. Юрась Мацко кажа, што ўсяго ў пленэры бяруць удзел 15 мастакоў.

Малады мастак зь Менску Ягор Максімаў дапамагае свайму старэйшаму калегу Зьмітру Сурскаму майстраваць трактар. У яго відавочна добры настрой. Кажа, што на гэтым трактары да Менску не паедуць, а пакінуць тут у навакольлі, каб не было сумна мясцовым жыхарам.

Малады мастак зь Менску Ягор Максімаў дапамагае ў праекце Зьмітру Сурскаму

Малады мастак зь Менску Ягор Максімаў дапамагае ў праекце Зьмітру Сурскаму

— У нас ужо ёсьць ровар трохколавы, таксама з катушак, і цяпер вось узяліся за трактар. Ведаеце, мясцовыя людзі прыходзяць, цікавяцца, пытаюцца, мы зь імі размаўляем, даўно ўжо не было нечага такога. Ды яшчэ адсьвяткавалі тут Купальле, патанцавалі, паслухалі канцэрт Шалкевіча — цудоўны настрой, нават ня хочацца зьяжджаць.

Праца дызайнэра Кірыла Кухарчука з Масквы

Праца дызайнэра Кірыла Кухарчука з Масквы

А вось дызайнэр Кірыл Кухарчук кажа, што сам беларус, працуе ў Маскве. Усё кінуў, прыехаў сюды на пленэр — і не шкадуе, яго тут усё задавальняе. Ягоная праца — гэта салата зь відэльцам і нажом на талерцы.

— Тут усё проста здорава, мне вельмі падабаецца гэтая вёсачка з цудоўнымі ляндшафтамі, тут можна шмат чаму навучыцца ў калегаў, паказаць сваю працу і наагул пагаварыць пра мастацтва. Я тут першы раз і папросту захоплены пленэрам.

Мастак з Салацьця Сяргей Кірко

Мастак з Салацьця Сяргей Кірко

Мастак Сяргей Кірко сам жыве ў Салацьці. Ён зрабіў працу, якую назваў «Шалёная пчолка», і ведае, што яе паставяць у мястэчку Парэчча побач зь месцам, дзе заўсёды прадаюць мёд. Кірко кажа, што галоўнае, каб ягоная праца выклікала пазытыўны настрой ва ўсіх, хто будзе праходзіць побач.

— Я ўдзельнічаю ў пленэры ўжо другі раз і павінен сказаць, што мы заўважна выйшлі на больш высокі ўзровень мастацкіх працаў. Дый сама арганізацыя пленэру набыла таксама больш прафэсійны характар. Думаю, сюды варта прыяжджаць мастакам.

Салацьце — невялікая вёска сярод лясоў і прыгожых вялікіх азёраў. Магчыма, якраз дзеля цікавых ляндшафтаў нямала гарадзенскіх мастакоў панабывалі тут хаты і жывуць ужо гадамі.

XS
SM
MD
LG