На хутары Шаблі, што ў Валожынскім раёне, 16 ліпеня пройдзе восьмы фэстываль этнічнай музыкі «Вольнае паветра».
Хэдлайнэрамі фэстывалю стануць «Стары Ольса» і Re1ikt, таксама выступяць гурты Vuraj, Iluzhan, Pawa, «Мярэжа», «Колеснiя», «Варган», «Рада», клюб традыцыйнага танцу «Сіта» і іншыя. Праграму закрыюць інструмэнтальны праект Triangle і «Сьпеўны сход».
Акрамя музыкі, удзельнікам прапануюць «экстрэмальныя актыўнасьці», майстар-кляс па паветраных зьмеях, «Горад майстроў», фэстываль фарбаў і спаборніцтвы па кіданьні каровіных праснакоў.
Квіткі прадаюцца папярэдне ў менскай «Тэатральнай касе» на вул. Калініна, 5, а таксама ў інтэрнэце. Цана — 25 дэнамінаваных рублёў (у дзень канцэрта будзе даражэй), дзецям да 12 уваход вольны. Ладзіцца праезд зь Менску і назад.