Зьвер гойсаў ад двара да двара пакуль не натрапіў на мужчыну зь сякерай. Пра гэта інфармуе тэлеканал Белсат.
Позна ўвечары ў пятніцу ў адзін з двароў вёскі Першамайск забег воўк, які напаў на сабаку. На шум з хаты выйшаў гаспадар — воўк напаў і на яго. На шум выбегла гаспадыня, якую воўк таксама пакусаў.
Пасьля воўк напаў на суседа пацярпелых, а пасьля атакаваў і пакусаў каня і некалькі сабак.
Нарэшце ён кінуўся на грамаду вясковых мужчын, якія вярталіся з працы. Адзін зь іх меў у руках сякеру, якой ваўка і забілі.
Фельчар Міхаіл Акушэвіч распавёў тэлеканалу «Тэлевід», што тры чалавекі зь першай сям’і атрымалі шматлікія ірваныя раны рук і ног, іхнаму суседу воўк пракусіў шчаку.
Пацярпелых адвезьлі ў шпіталь.
У суботу раніцай у вёску прыехалі вэтэрынары з Гомля, якія адрэзалі ваўку галаву, каб дасьледаваць яе на шаленства. Цела воўка закапалі, пакусаных сабак усыпілі, а іншым сабакам зрабілі прышчэпкі.
Жыхары Першамайску распавялі журналістам, што ў навакольных лясах распладзілася вельмі шмат ваўкоў.
