Лінкі ўнівэрсальнага доступу

У Менску пройдзе матч памяці Юрася Бушлякова


Юрась Бушлякоў у студыі Радыё Свабода

Юрась Бушлякоў у студыі Радыё Свабода

У суботу 9 ліпеня менскія журналісты і пісьменьнікі правядуць традыцыйны футбольны матч памяці мовазнаўцы Юрася Бушлякова, які памёр у 2013 годзе. Юрась Бушлякоў быў апантаным спартовым заўзятарам і футбалістам-аматарам.

Першы матч памяці Юрася прайшоў 12 ліпеня 2013 году. У ім узялі ўдзел пісьменьнікі і журналісты Альгерд Бахарэвіч, Алесь Емяльянаў, Віктар Жыбуль, Павел Касцюкевіч, Серж Мінскевіч, Барыс Пятровіч, Мікалай Тоўсцік, Андрэй Хадановіч, Віталь Цыганкоў і іншыя.

— Юрась любіў любы спорт, быў аматарам многіх відаў, часам ня самых папулярных, але футбол вабіў яго асабліва, — узгадвае журналіст Віталь Цыганкоў. — Калі я ўпершыню сустрэўся зь ім на футбольным полі, я быў уражаны, як добра. і я б сказаў, жорстка ён гуляў. Бо мне здавалася. што чалавек зь ягонай мажнай камплекцыяй і мяккім характарам і на полі павінен быць «мяккім і пухнатым». Але не, Бушлякоў на полі быў валявым і рашучым, але пры гэтым, безумоўна, карэктным і акуратным. Штогод пісьменьнікі і журналісты, якія калісьці гулялі разам з Юрасём — ці ў Менску, ці ў Празе — зьбіраюцца ў раёне Зялёны Луг у беларускай сталіцы на матч памяці Бушлякова.

Сёлетні матч, трэці па ліку, адбудзецца там, дзе і папярэднія — на стадыёне школы № 13 на скрыжаваньні вуліц Цікоцкага і Карбышава (адрас: вул. Цікоцкага, 57). Пачатак а 19.00

Удзельнікі першага матчу памяці Юрася Бушлякова. Фота з сайту Budzma

Удзельнікі першага матчу памяці Юрася Бушлякова. Фота з сайту Budzma


Юрась Бушлякоў (29 траўня 1973, Менск — 4 чэрвеня 2013, Менск) — беларускі мовазнавец, журналіст, перакладчык. Кандыдат філялягічных навук. Працаваў выкладчыкам на катэдры сучаснай беларускай мовы БДУ (1999–2003). Адначасова займаўся журналістыкай, працаваў у тэлекампаніі «ФІТ», на менскім радыё «101,2», у штотыднёвіку «Наша ніва», на радыё «Рацыя» (1999–2002), з 1996 году супрацоўнічаў з «Радыё Свабода». Адзін з суаўтараў кнігі «Беларускі клясычны правапіс». Аўтар кнігі «Жывая мова». Пераклаў на беларускую мову паасобныя творы Чэслава Мілаша, Эдгара Алана По, Вітальда Гамбровіча, Зьбігнева Гэрбэрта, Яраслава Сэйфэрта.

Паказаць камэнтары

XS
SM
MD
LG