Лінкі ўнівэрсальнага доступу

Ярмошына раскажа дэпутатам ПАРЭ пра свабоду СМІ ў Беларусі


Лідзія Ярмошына

Лідзія Ярмошына

Удзельнікі сёньняшняга паседжаньня Цэнтральнай выбарчай камісіі аднагалосна прагаласавалі за тое, каб старшыня ЦВК Лідзія Ярмошына 3-5 ліпеня прадставіла Беларусь у Бэрліне, дзе пройдзе міжнародны сэмінар «Свабода СМІ як кутні камень дэмакратычных выбараў».

У мерапрыемстве возьмуць удзел прадстаўнікі краін, якія ўваходзяць у праграму Усходняга партнэрства, Вэнэцыянскай камісіі, БДІПЧ АБСЭ і дэпутаты Парлямэнцкай Асамблеі Рады Эўропы.

Паводле сакратара ЦВК Мікалая Лазавіка, з Бэрліну паступіла асабістае запрашэньне для старшыні ЦВК Лідзіі Ярмошынай. Міністэрства замежных спраў Беларусі палічыла мэтазгодным накіраваць Лідзію Ярмошыну ў Бэрлін для таго, каб яна выклала афіцыйную пазыцыю аб ролі сродкаў масавай інфармацыі, аб журналісцкай этыцы і іншых пытаньнях, зьвязаных зь дзейнасьцю журналістаў у часе выбарчых кампаній.

Сваю згоду на паездку Ярмошынай у Бэрлін даў і Аляксандар Лукашэнка.

Сёньня Лідзія Ярмошына паведаміла, што місія БДІПЧ АБСЭ магчыма прыедзе ў Менск пазьней, чым гэта было дагэтуль. А тэхнічная місія БДІПЧ магчыма наагул на гэтыя выбары не прыедзе. Паводле Ярмошынай, прадстаўнікі БДІПЧ паведамілі ёй, што яны добра ведаюць сытуацыю ў краіне, бо прыяжджалі на прэзыдэнцкія выбары, а за гэты час мала што зьмянілася.

Таму ня выключана, што доўгатэрміновыя назіральнікі БДІПЧ АБСЭ на выбары ў Палату Прадстаўнікоў прыедуць пазьней, чым гэта традыцыйна рабілася падчас парлямэнцкіх кампаній.

XS
SM
MD
LG