Абураныя адмовай рэспубліканскай большасьці паставіць на галасаваньне праект закону, дэмакраты ў сераду раніцай у поўным складзе разьмясьціліся на падлозе залі пасяджэньняў Палаты прадстаўнікоў і запатрабавалі ад сьпікера, рэспубліканца Пола Раяна, усё ж паставіць законапраект на галасаваньне. Яны адмовіліся падпарадкоўвацца правілам і не дазволілі Раяну правесьці галасаваньне па іншых пытаньнях парадку дня. Рэдкі ў амэрыканскіх абставінах пратэст узначаліў 76-гадовы кангрэсмэн Джон Луіс, вэтэран барацьбы за раўнапраўе афраамэрыканцаў у 60-х гадах мінулага стагодзьдзя.
Дэмакраты прапануюць законапраект, згодна зь якім асобам, унесеным спэцслужбамі ў розныя сьпісы падазраваных у сувязях з тэрарыстамі, будзе адмоўлена ў набыцьці зброі. Рэспубліканцы кажуць, што часьцяком у гэтыя сьпісы людзі трапляюць выпадкова. Гэта значыць, што закон падарве правы законапаслухмяных амэрыканцаў.
Падтрымку пратэстоўцам выказалі многія вядомыя дэмакраты, уключаючы прэзыдэнта Барака Абаму і былога прэзыдэнта Біла Клінтана.
Апошні гэткі сядзячы страйк быў зладжаны некалькі гадоў таму рэспубліканцамі, якія былі тады ў меншасьці ў Палаце прадстаўнікоў. Кіраўнікі дэмакратаў спынілі пратэст, даўшы ўказаньне адключыць сьвятло ў залі пасяджэньняў. Сьпікер Пол Раян адмаўляецца ад выкарастаньня такога захаду. Па словах некаторых удзельнікаў, пратэст можа зацягнуцца да пятніцы, 24 чэрвеня.
