Лінкі ўнівэрсальнага доступу

logo-print

Брытанскі парлямэнт правёў надзвычайнае пасяджэньне


Брытанскі парлямэнт, які знаходзіцца на вакацыях, сёньня сабраўся на пазачарговую сэсію, каб ушанаваць памяць Джо Кокс, члена парлямэнту ад лейбарысцкай партыі, якая памерла ад агнястрэльных і нажавых ран. Кокс была забітая ў мінулы чацьвер у сваёй выбарчай акрузе ў Заходнім Ёркшыры. Нападнікам быў жыхар гарадка Бэрстал Томас Мэйр.

Заля палаты абшчын была перапоўненая. На галерэі для гледачоў знаходзіліся сваякі і сябры Кокс, у тым ліку яе муж Брэндан зь дзецьмі і яе бацькі. У часе паўтарагадзіннага пасяджэньня выступілі сьпікер парлямэнту, прэм’ер-міністар і члены ўсіх палітычных партый. Лідэр лейбарыстаў Джэрэмі Корбін назваў забойства Джо Кокс атакай на дэмакратыю, якая шакавала ўсю краіну. Прэм’ер-міністар Дэйвід Кэмэран падкрэсьліў што цяперашнія і будучыя парлямэнтарыі будуць шанаваць памяць Джо Кокс, пацьвярджаючы, што дэмакратыя, якую яна адстойвала, непарушная. Па завяршэньні парлямэнцкай сэсіі дэпутаты прайшлі ў царкву Сьв. Маргарыты ў Вэстмінстары, дзе адбылася жалобнае набажэнства.

Паводле інфармацыі газэты Таймс, Джо Кокс павінна была выступіць у парлямэнце з адмысловым дакладам, прысьвечаным радыкальнаму нацыяналізму ў Брытаніі. Яна праводзіла кампанію за захаваньне членства Брытаніі ў Эўрапейскім Зьвязе.

Прыпыненая ў сувязі з забойствам Джо Кокс кампанія напярэдадні рэфэрэндуму аб членстве Вялікай Брытаніі ў ЭЗ, аднавілася. Рэфэрэндум прызначаны на 23 чэрвеня.

Абвінавачаны ў забойстве Джо Кокс 52-гадовы Томас Мэйер паўстаў перад судом у Лёндане ў суботу і ў панядзелак. Калі судзьдзя Вэстмінстэрскага суду папрасіў яго назваць сваё імя, Мэйер выгукнуў: «Сьмерць здраднікам, свабоду Брытаніі!». Судовае пасяджэньне па справе аб забойстве Джо Кокс перанесена на чацьвер.

XS
SM
MD
LG