Афіша:
У Менску пройдзе Фэстываль фарбаў ColorFest разам з фэстывалем ColorMadness. Месца правядзеньня: Дрымлэнд (вул. Арлоўская, 80). Пачатак а 12.00.
У Музэі народнай архітэктуры і побыту пад Менскам пройдзе Фэстываль сярэднявечнай культуры і традыцыяў «Эпоха рыцарства». У музычнай частцы фэстывалю выступіць гурт сярэднявечнай беларускай музыкі «Стары Ольса». Пачатак а 12:00.
У прасторы «ЦЭХ» (Менск, вул. Кастрычніцкая, 16) у межах праекту ECLAB_Інтэракцыя нямецка-амэрыканская дасьледчыца Аніка Валькэ прэзэнтуе сваё дасьледаваньне і кнігу «Піянэры і партызаны: вусная гісторыя нацысцкага генацыду ў Беларусі». Пачатак а 18.30.
На Плошчы Свабоды ў Менску адбудзецца джазавы канцэрт, у якім выступяць джаз-бэнд Аркестру ваенна-паветраных сілаў ЗША ў Эўропе, Іен Шоў зь Вялікабрытаніі, трыё Канстанціна Гарачага зь Беларусі ды нямецка-францускі дуэт Nils Wogram/Bojan Z. Пачатак а 20:00.
У Музэйным комплексе «Дудуткі» пачнецца купальскі open-air фэст «Сьвята Сонца». На галоўнай пляцоўцы фэсту адбудзецца канцэрт з удзелам калектываў айчыннай і замежнай folk/folk-rock і pagan сцэны. Цягам двухдзённага фэсту таксама пройдуць разнастайныя імпрэзы, сэмінары і майстар-класы.
У гісторыі:
1586 — Нясьвіж атрымаў герб.
1815 — адбылася бітва пад Ватэрло.
1840 — расейскі імпэратар Мікалай І выдаў указ аб забароне выкарыстаньня ў афіцыйных дакумэнтах тэрмінаў «Беларусь», «Літва», «беларускія» і «літоўскія» губэрні і ўвядзеньні замест іх назвы «Паўночна-Заходні край».
1911 — нарадзіўся Аляксандр Шыдлоўскі, беларускі культурны дзеяч, кампазытар, аўтар песьні «Колькі ў небе зор».
1926 — нарадзіўся Рыгор Масальскі, беларускі кінаапэратар, заслужаны дзеяч мастацтваў Беларусі.
1939 — нарадзіўся Алег Янчанка, беларускі арганіст, кампазытар.
1942 — нарадзіўся Пол Макартні, удзельнік гурту «Бітлз». Сьпявак, музыка, кампазытар.
1989 — заснаваны Ліцэй БДУ.
У памяці:
1936 — памёр Максім Горкі, расейскі пісьменьнік.
Цытата:
«Жыцьцё тасуе нас як карты, і толькі выпадкова — і тое не надоўга — мы трапляем на сваё месца».
Максім Горкі